Aqmola oblysynyń turǵyny aýlasynda qarasora ósirip, esirtki jasaǵan
Oblystyq polıtsııa departamenti baspasóz qyzmetiniń málimetinshe, qyrkúıektiń 14-inde oblys aýmaǵynda júrgizilgen «Qarasora-2022» respýblıkalyq jedel aldyn alý is-sharasy barysynda Tselınograd aýdanyndaǵy Jańaesil aýylynyń 49 jastaǵy turǵyny úı aýlasynda qarasora ósirgeni anyqtaldy.
«Úı aýlasynda ósip turǵan, quramynda esirtki bar 30-ǵa jýyq shóp tabylyp tárkilendi. Sonymen birge, sharýashylyq qurylystardan 20 lıtrlik ydysqa, 2 qutyǵa jáne 1 paketke salynǵan sur-jasyl tústi ósimdik tektes zat alyndy. Tárkilengen zat esirtkiniń marıhýana túri bolyp sanalady», - dedi vedomstvodan.
Polıtsııa anyqtaǵandaı, er adam qarasorany bıylǵy jyldyń kókteminde úı aýlasyna otyrǵyzǵan. Ósirilgen qarasorany esirtki jasaý úshin shıkizat retinde paıdalanǵan, al keıin ózi de tutynǵan.
«Qazirgi kezde osyǵan baılanysty Qylmystyq kodekstiń 296-baby 2-bóligi (esirtki zattarymen zańsyz aınalysý) boıynsha sotqa deıingi tergeý amaldary qolǵa alyndy. Saraptama taǵaıyndaldy», - dep tolyqtyrdy vedomstvodan.
Aıta ketsek, Kókshetaýda kásiporyn qyzmetkeri 240 akkýmýlıatordy zańsyz satyp jibergen.
