Aqmola oblysynyń turǵyny 107-ge toldy
KÓKShETAÝ. QazAqparat - Arshaly kentiniń turǵyny Palageıa Antıpova óziniń 107 jasqa tolǵan týǵan kúnin atap ótpek. Onyń búginde bes nemeresi, toǵyz shóberesi jáne bes nemenesi bar, dep habarlaıdy «QazAqparat» HAA-niń tilshisi óńirlik kommýnıkatsııalar qyzmetine silteme jasap.
Arshaly aýdanynyń ákimi Azamat Taıjanov aýdan ortalyǵynda turatyn 107 jastaǵy qarııa, eńbek ardageri Palageıa Antıpovany úıine baryp, týǵan kúnimen quttyqtady.
Ǵasyrdy artqa tastaǵan keıýana Reseıdiń Altaı ólkesindegi Syropıatova eldimekeninde dúnıege kelgen eken. Balalyq shaǵynan qıyndyq kórgen úıdiń úlkeni Qazan tóńkerisi, azamat soǵysy jáne Uly Otan soǵysy jyldarynda ata-anasyna kómektesip, ózinen keıingi 11 ini-qaryndastaryna qamqor bolǵan. «Jastaıymnan erte eseıip, eńbekke erte aralastym. Turmysqa erte shyqtym, tórt balany dúnıege ákeldim», - dep eske alady keıýana.
Jyldar óte kele áıeldiń jaǵdaıy túzelip, balalary er jetip erteńgi kúnge degen senim paıda bolady. Keńes bıligi qalyptasqan ujymdastyrýdyń urtoqpaǵy artta qaldy.
Alaıda 1941 jyly Uly Otan soǵysy bastalyp ketip, jubaıy Efım Antıpov qyzyl armııa qataryna shaqyrylady. Basynan muń ketpegen áıel qaıtadan turmystyń aýyr qamytyn arqalaýǵa májbúr bolady. Ujym tirligine belsene kirisken qaıratty áıel traktorshylardyń kýrsyn oqyp, kolhozdyń temir tulparyn tizgindeıdi. Eki birdeı ulyn soǵys jalmaǵan Palageıanyń kúıeýi maıdannan eline aman esen oralypty. Alaıda soǵystan keıingi jyldar da ońaıǵa soqpaǵan.
Keıin 1949 jyly Pelageıa Ivanovna otbasymen birge Qazaqstanǵa qonys aýdarady. Aldymen balabaqshaǵa kútýshi bolyp jumysqa kirgen áıel, keıin aýyl keńesinde eden jýýshy, odan soń jergilikti feldsherlik pýnkttiń tazalyqshysy bolyp jumys isteıdi. Jubaıy qaıtys bolǵannan keıin balalarymen birge burynǵy Vıshnevka qazirgi Arshaly kentine turaqtaǵan. Qazir keıýana bes nemere, toǵyz shóbere jáne bes nemene súıip otyrǵan ardaqty ana.
Alǵys haty, bir shoq gúli men syılyqtaryn arqalap kelgenaýdan ákimi Azamat Taıjanov qarııanyń ómiri men eńbek joly keleshek jastar úshin úlgi-ónege ekenin atap ótti.
«Biz sizdi árqashan qurmet tutamyz. Sizdiń aqylyńyz, tózimdiligińiz ben maqsatkerligińiz urpaqqa úlgi bolmaq. Sizdiń baı ómirlik tájirıbeńiz óskeleń urpaqty patrıottyq rýhta tárbıeleýge yqpal etetin bolady», dedi A.Taıjanov óz sózinde.
