Aqmola oblysynyń turǵyndary zamanaýı emhanalarda emdeletin bolady
NUR-SULTAN. QazAqparat - Búgin Densaýlyq saqtaý mınıstriniń birinshi orynbasary Marat Shoranov Aqmola oblysyndaǵy medıtsınalyq mekemelerdi aralady. Ol Kókshetaý qalasyndaǵy jańa modýldik juqpaly aýrýlar aýrýhanasynyń, zamanaýı eki emhananyń qurylysymen tanysty, dep habarlaıdy QazAqparat tilshisi.
QR DSM baspasóz qyzmeti taratqan málimetke saı, eki emhananyń birinshisi Şýchınsk qalasynda ornalasqan jáne 2020 jyldyń 4 toqsanynda tapsyrylady. Jańa ǵımaratty MJÁ aıasynda «Avıtsenna-Býrabaı» JShS saldy.
«Býrabaı aýdanynda kóptegen jyldar boıy tıptik emhana ǵımaraty bolmaǵandyqtan, medıtsınalyq qyzmet kórsetýde túrli problema kezdesti. Jańa emhana barlyq sapa standarttaryna saı bolady», - dedi M.Shoranov.
Emhana bir aýysymda 1000 naýqasqa, al statsıonar 170 tósek-orynǵa eseptelgen. Munda mamandandyrylǵan medıtsınalyq qyzmet, MSAK, shuǵyl jáne dárigerge deıingi kómek kórsetiledi. Emhana KT, MRT, rentgen apparatymen, ÝDZ apparattarymen, mammografpen jáne t.b. jabdyqtalǵan.
Kókshetaý qalasyndaǵy ekinshi emhana onkologııalyq naýqastardy qabyldaıdy. Qazir patsıentterdi oblystyq kópbeıindi aýrýhananyń Onkologııalyq ortalyǵy bazasynda qabyldap jatyr, bul azamattarǵa qolaısyz. 2020 jylǵy 30 qazanda qurylysy aıaqtalatyn jańa emhana medıtsınalyq mekemeniń júktemesin azaıtady.
