Aqmola oblysynyń prokýratýrasy aıyppuldardy óndirip alý máselesin synǵa aldy

KÓKShETAÝ. QazAqparat - Kókshetaýda Aqmola oblysy prokýratýrasynyń zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi quqyq qorǵaý organdarynyń Úılestirý keńesiniń otyrysy ótti, dep habarlaıdy QazAqparat tilshisi oblys prokýratýrasyna silteme jasap.

Vedomstvonyń málimetinshe, otyrysta mal urlyǵynyń aldyn alý jaǵdaıy týraly polıtsııa departamentiniń, aýyl sharýashylyǵy jáne veterınarııa basqarmalarynyń jaýapty qyzmetkerleri baıandady.

Atap ótilgendeı, ótken jyly mal urlyǵynyń 225 jaǵdaıy tirkelgen.

«Urlanǵan 1600 bas maldyń tek jartysy ǵana ıelerine qaıtaryldy. Aǵymdaǵy jyly mal urlyǵynyń 50-den astam jaǵdaıy tirkeldi, bul rette 90-nan astam bas urlanǵan, tek 44-i nemese 47 paıyzy ǵana tabyldy», - dep atap ótti vedomstvodan.

Kún tártibindegi ekinshi másele esirtki qylmysynyń aldyn alýǵa arnaldy. Arnaıy saıttar, Telegram-arnalar jáne bottardyń kómegimen avtomattandyrylǵan satý júıesi bar chattar arqyly esirtki satý qarqyndy damyp kele jatqandyǵy sóz boldy. Tipti, kýrerge bos oryndary bar saıttar da bar. Mysaly, Kókshetaýda bir apta ishinde 350 myń teńgege deıin aqsha tabýǵa bolady, tólem krıptovalıýtamen jasalady. Sońynda bıýdjetti tolyqtyrý kózderiniń biri bolyp tabylatyn ákimshilik aıyppuldardy óndirip alý máseleleri qaraldy. Aqmola oblysynyń prokýrory Aıdos Maılybaev ótken jyldyń qorytyndysy boıynsha Aqmola oblysynyń ýákiletti organdary aıyppuldardyń tek 58 paıyzyn óndirdi degen syn aıtty.

«Aǵymdaǵy jyldyń birinshi toqsanynyń qorytyndysy boıynsha kesteniń sońynan bastap biz 50 paıyzben besinshi orynda turmyz», - dep túıindedi A.Maılybaev.

Bıylǵy jyly oblystyń ýákiletti organdary 830 mln teńgege 40 myńǵa jýyq aıyppul saldy, onyń 418 mln teńgesi ǵana tólengen.

Talqylaý qorytyndysynda árbir másele boıynsha jaǵdaıdy jaqsartý baǵytynda naqty sharalar aıqyndaldy, ýákiletti jáne múddeli memlekettik organdarǵa jumysty jandandyrý jóninde naqty tapsyrmalar berildi.