Aqmola oblysynyń polıtseıleri urlanǵan júk kóligin bir saǵat boıy qýdy
KÓKShETAÝ. QazAqparat - Aqmola polıtseıleri júk kóligin aıdap áketken 25 jastaǵy aqmolalyqty qýýǵa májbúr boldy, dep habarlaıdy QazAqparat tilshisi oblystyq polıtsııa departamentiniń baspasóz qyzmetine silteme jasap.
Vedomstvonyń málimetinshe, mamyrdyń 3-de tańerteń Kókshetaý qalasy polıtsııa basqarmasynyń kezekshi bólimine Krasnoıar aýylynyń turǵyny júk kóligin belgisiz bireýdiń aıdap áketkenin aıtyp kómek suraǵan. Kólik ıesine keltirilgen shyǵyn kólemi 500 000 teńgeni qurady.
«Polıtsııa qyzmetkerleri qylmystyń túnde jasalǵanyn anyqtady. Kúdikti úıdiń janynda turǵan «ZIL» markaly avtokóligin aıdap áketken. Patrýldik polıtsııa jáne jergilikti atqarý organdarynyń qyzmetkerleri jedel izdestirý sharasy barysynda beınebaqylaý kamerasy arqyly kólikti anyqtady. Kúdikti qýdalaý kezinde kólikti toqtatý týraly zańdy talapty oryndamady», - dedi vedomstvodan.
Birneshe saǵattan keıin «Ásker-1» patrýldik polıtsııasy ekıpajynyń qyzmetkerleri leıtenant Darhan Bopıev pen leıtenant Oljas Tileýov «Rýzaevka – Kókshetaý» avtojolynyń 3 shaqyrymynda urlanǵan kólikti toqtatty. Kólik ishinde 25 jastaǵy qaskúnemnen bólek, onyń anasy bolǵan.
«Qazirgi kezde osy jaǵdaıǵa baılanysty Qylmystyq kodekstiń 200-babynyń 1-bóligi «Avtomobıldi zańsyz ıelený» boıynsha sotqa deıingi tergeý bastaldy. Sondaı-aq mas kúıinde kólik quralyn júrgizgeni jáne polıtsııa qyzmetkeriniń talaptaryn oryndamaǵany úshin ákimshilik hattamalar toltyryldy», - dep tolyqtyrdy vedomstvodan.
