Aqmola oblysynyń onkodıspanseri 62,5 mln teńgeniń mammografymen tolyqty
KÓKShETAÝ. QazAqparat - Aqmola oblysynyń onkodıspanseri quny 62,5 mıllıon teńgege jyljymaly mammograf satyp aldy, dep habarlaıdy QazAqparat tilshisi.
Oblystyq densaýlyq saqtaý basqarmasy baspasóz qyzmetiniń málimeti boıynsha, oblys aýmaǵyndaǵy 12 emdeý-aldyn alý mekemesinde ǵana mammograf bar. Óńirdiń 8 aýdanynda «KamAZ» kóligine ornatylǵan jyljymaly mammograf arqyly zertteý júrgizilip keledi.
«Sút bezi obyry Aqmola oblysynda keńinen taraǵan aýrýlardyń birinen sanalady. Jyl saıyn óńirde 200-den astam áıelden túrli deńgeıde sút bezi ragy anyqtalady.
Sút beziniń obyry- áıelder arasynda eń jıi kezdesetin onkologııalyq aýrý. Ony erte anyqtap, aldyn alý úshin áıelder 40-jastan asqan soń mindette túrde (skrınıngtik) mammografııalyq tekseristen ótip turýy tıis.
Sol sebepti, bıýdjet qarajatyna satyp alynǵan 62,5 mıllıon teńgeniń jańa jyljymaly mammografy shalǵaı eldimekendegi áıelderdiń ýaqytyly tekserilýine múmkindik beredi. Mammograf arnaıy elektrondy tehnıkamen jabdyqtalǵan. Kólemi 1 santımetrge deıingi sút beziniń qaterli isigin anyqtaı alady. Bul óz kezeginde áıelderdiń ómirin saqtap, tolyq emdelip ketýine múmkindik beredi», - dep túsindirdi baspasóz qyzmetindegiler.
