Aqmola oblysynyń ónerkásip salasynda tsıfrlyq tehnologııa engizilýde

KÓKShETAÝ. QazAqparat - Aqmola oblysynyń ákimi Málik Myrzalın oblystyq máslıhat depýtattary aldynda ótken eseptik kezdesýinde óńirdegi ónerkásip salasynda tsıfrlyq tehnologııalardy engizý jumystary qarqyn ala bastaǵanyn atap ótti, dep habarlaıdy QazAqparat tilshisi.

«Tehnologııalyq damýdyń jańa deńgeıine ótý mańyzdylyǵy eskerile kele, óńirdegi ónerkásip kásiporyndarynda tsıfrlyq tehnologııalardy engizý boıynsha 2018-2019 jyldarǵa arnalǵan jospar jasaldy», dedi aımaq basshysy.

Málik Myrzalınniń aıtýynsha, qazirgi kezde oblystaǵy 20-dan astam kompanııa ónerkásip salasynda tsıfrlyq tehnologııalardy qoldanyp júr. 

«Kásiporyndar tehnologııalyq jańǵyrýǵa ınvestıtsııa bólýde belsendilik tanytyp otyr. Aǵymdaǵy jyldyń 8 aıynda 40 mıllıard teńge qarjy ıgerildi. Bul ótken jylmen salystyrǵanda 2 esege artyq», dedi M.Myrzalın.

Ósim draıveri retinde oblysta quny 74 mıllard teńgeni quraıtyn 30 joba júzege asyrylýda. Bul óz kezeginde 1820 jańa jumys ornyn ashýǵa múmkindik bermek. Bulardyń ishinde 7 iri joba ındýstrııalandyrý kartasy sheńberinde júzege asyrylýda.