Aqmola oblysynyń oqý oryndarynda Táýelsizdik jetistikterine arnalǵan ashyq sabaqtar ótti

KÓKShETAÝ. QazAqparat - Óńirdiń 553 mektebi men 32 kolledjinde «Táýelsizdik jetistikteri» - «Dostıjenııa Nezavısımostı» taqyrybymen el Táýelsizdiginiń 30 jyldyǵyna arnalǵan biryńǵaı ashyq sabaqtar ótti, dep habarlaıdy QazAqparat tilshisi Aqmola oblystyq ishki saıasat basqarmasyna silteme jasap.

Bilim basqarmasynan atap ótkendeı, sabaq barysynda oqýshylarǵa Egemen Qazaqstannyń jetistikteri, kóp ǵasyrlyq tarıhy, eldiń kópqyrly mádenı murasy, respýblıkanyń saıası turaqtylyǵy men áleýmettik-ekonomıkalyq damýy, Qazaqstannyń Tuńǵysh Prezıdenti – Elbasy Nursultan Nazarbaevtyń memlekettiń qalyptasýy men damýyndaǵy sińirgen eńbekteri týraly aıtyldy.

Ashyq sabaqtarǵa qonaq retinde eńbek ardagerleri, aýdandardyń, qalalardyń qurmetti turǵyndary, Aqmola oblysy men eldiń damýyna eleýli úles qosqan qoǵam qaıratkerleri shaqyryldy. Oblys ortalyǵynyń bilim berý uıymdarynda ashyq sabaqtar toptamasy №5 «Tańdaý» kópsalaly gımnazııasynan bastaldy.

Іs-shara barysynda tarıh pániniń muǵalimi Álııa Ahetova oqýshylarǵa elimizdiń jetistikteri, memlekettiń saıası jáne áleýmettik reformalary, tarıhy, Qazaqstan halqynyń birligi týraly aıtyp berdi.

«Bıyl biz elimiz úshin mańyzdy oqıǵa – Táýelsizdiktiń 30 jyldyǵyn atap ótemiz. Osy kezeńde respýblıka kóptegen baǵyttar boıynsha úlken jetistikterge jetti. Búgin biz búkil álemge tanymal elge aınaldyq», - dep bólisti 10-synyp oqýshysy Jannatbek Mámıev.

Osy taqyryptaǵy kezdesýlerdiń taǵy biri tehnıkalyq jáne kásiptik bilim beretin jetekshi uıymdardyń biri – Kókshetaý joǵary tehnıkalyq kolledjinde ótti. Oǵan pedagogıkalyq eńbek ardageri, «Ybyraı Altynsarın» tósbelgisiniń ıegeri Aleksandr Kranın qatysty.

«Bıylǵy jyl bizdiń elimizdiń tarıhynda mańyzdy kún – Táýelsizdiktiń 30 jyldyǵymen erekshelenedi. Búgin meni kóp jyldar boıy jumys istegen kolledjge shaqyrdy. Men úshin jas urpaqpen kezdesý, balalarǵa tehnıkalyq jáne kásiptik bilimniń qalyptasýy, osy saladaǵy joǵary jetistikter týraly eske alý jáne aıtý úlken mártebe», - dedi Eńbek ardageri.

Bul joba oblystyń bilim berý uıymdarynyń 140 myńǵa jýyq oqýshylary men stýdentterin qamtydy. Sabaqtarda elimizdiń ótkeni men búgini týraly belsendi pikirtalas ótkizildi, balalar ózderin qyzyqtyrǵan suraqtaryn qoıdy. Sabaq sońynda oqýshylar Qazaqstannyń jańa tarıhyn bilýge arnalǵan onlaın-testten ótti. Barlyq sabaqtar sanıtarlyq-epıdemıologııalyq normalardy saqtaı otyryp ótkizildi.