Aqmola oblysynyń narkoortalyq qyzmetkerlerine jalaqy qaryzy qaıtaryldy
KÓKShETAÝ. QazAqparat - Aqmola oblysy Zerendi aýdanynyń Razdolnoe aýylyndaǵy Esirtkige táýeldi adamdardy áleýmettik-psıhologııalyq ońaltý ortalyǵy basshylyǵynyń qyzmetkerler aldynda eńbekaqy boıynsha qordalanyp qalǵan 7,5 mıllıon teńge qaryzy tolyq óteldi. Basshylyq qyzmetkerlerine 2018 jyldyń 1 qańtar jáne 15 sáýir aralyǵyna deıin jalaqy bermeı kelgen, dep habarlaıdy QazAqparat tilshisi Aqmola oblystyq ishki saıasat basqarmasynyń baspasóz qyzmetine silteme jasap.
Aqmola oblysynyń densaýlyq saqtaý basqarmasynyń deregi boıynsha QR Úkimetiniń qaýlysymen QR ІІM janynda jumys istegen esirtkige táýeldi adamdardy áleýmettik-psıhologııalyq ońaltý ortalyǵy respýblıkalyq menshikten oblystyq ákimdikke tapsyryldy.
Aqmola oblysynyń densaýlyq saqtaý basqarmasynyń biryńǵaı perspektıvaly jospary sheńberinde 2018 jyldan bastap, Esirtkige táýeldi adamdardy áleýmettik-psıhologııalyq ońaltý ortalyǵy men oblystyq psıhıkalyq aýrýhanany qosý arqyly, atalmysh ortalyq «Aqmola oblystyq psıhıkalyq densaýlyq» ShJQ MKK klasterine engizildi.
Qazirgi kezde, Aqmola oblysy ákimdiginiń qaýlysy negizinde atalǵan medıtsınalyq mekemeler qaıta uıymdastyrylýda.
Eske sala keteıik, atalmysh ortalyq medıtsınalyq nysany bolyp tabylady jáne esirtkige táýeldi adamdarǵa áleýmettik-psıhologııalyq, ońaltý qyzmetterin kórsetedi.
