Aqmola oblysynyń medıtsına uıymdary úshin jyl saıyn shamamen 85 mlrd teńge qajet

KÓKShETAÝ. QazAqparat - Aqmola oblysynyń medıtsınalyq uıymdary úshin jyl saıyn shamamen 85 mıllıard teńge qajet, dep habarlaıdy QazAqparat tilshisi.

Oblystyq densaýlyq saqtaý basqarmasynyń málimetinshe, qazir áleýmettik medıtsınalyq saqtandyrý qory arqyly júzege asyrylyp jatqan qarjylandyrý Aqmola oblysy úshin jetkiliksiz. Óńirdiń densaýlyq saqtaý júıesin qarjylandyrý úshin bıyl jylǵa qarastyrylǵan 65 mıllıard teńgeniń ornyna shamamen 85 mıllıard teńge qarjy qajet.

«Sapaly medıtsınalyq kómekpen qamtamasyz etý boıynsha Aqmola oblysynyń medıtsınalyq uıymdary úshin jyl saıyn shamamen 85 mıllıard teńge qajet. Al densaýlyq saqtaý júıesinde josparlanyp otyrǵan barlyq jobalardy iske asyrý úshin jylyna shamamen 100 mıllıard teńge, onyń 85-i qor esebinen jáne 15 mıllıard teńgesi jergilikti bıýdjet qarajatynan qajet», - deıdi vedomstvodan.

Oblystyq densaýlyq saqtaý basqarmasynyń basshysy Narıman Syzdyqov óz sózinde óńirdiń densaýlyq saqtaý júıesindegi oń ózgeristerge aımaq basshysy Ermek Marjyqpaevtyń arqasynda qol jetkizilip otyrǵandyǵyn atap ótken edi. Onyń aıtýynsha, oblys bes jyl boıy qol jetkize almaı júrgen angıografty, sondaı-aq memlekettik emhanadaǵy jalǵyz kompıýterlik tomografty satyp aldy. Aqmola oblysynyń birde-bir memlekettik emhanasynda 2021 jylǵa deıin KT múldem bolmaǵan.

«Árıne, bizdiń medıtsına qyzmetkerleriniń dıplomnan keıingi bilimine nazar aýdarý kerek. Bizde bul is júzinde joq. Barlyq basqa salalarda qoldanylǵan bıýdjettik baǵdarlama bizde áli jumys istemeıdi. Mysaly, Shyǵys Qazaqstan oblysynda bir jylda medıtsına qyzmetkerleriniń bilimine shamamen 1,8 mıllıard teńge bólindi. Bizde jergilikti bıýdjetten ázirge oǵan aqsha bólinbeıdi. Sonymen qatar, dárigerlerdi shetelge oqýǵa jiberý kerek! Árbir emhana mamandaryn oqytý úshin shamaly qarajat bóledi. Alaıda, bul ádette, birneshe mamandy Astana qalasyna jiberýge ǵana jetedi. Búgingi kúni «Bolashaq» halyqaralyq baǵdarlamalar ortalyǵy arqyly respýblıka boıynsha kóptegen dárigerler shetelge baryp, taǵylymdamadan ótedi, magıstratýrany, doktorantýrany bitirip keledi. Olardyń qatarynda Aqmola oblysynan dárigerler joqtyń qasy», - deıdi Narıman Syzdyqov.

Aıta ketsek, Kókshetaý irgesindegi aýyl turǵyndaryna jyljymaly medıtsınalyq keshen kómek kórsetýde.