Aqmola oblysynyń mádenıet uıymdarynda bıýdjet qarajatyn urlaǵandar anyqtaldy

KÓKShETAÝ. QazAqparat - Aqmola oblysy prokýratýrasymen júrgizilgen tekserý nátıjesinde oblystyq mádenıet basqarmasynyń qurylymdyq bólimshelerinen sybaılas jemqorlyq faktileri anyqtaldy, dep habarlaıdy QazAqparat tilshisi oblystyq prokýratýranyń baspasóz qyzmetine silteme jasap.

Vedomstvonyń málimetinshe, oblys prokýratýrasymen jedel izdestirý is-sharalary taǵaıyndalyp, onyń nátıjeleri boıynsha «Qalalyq aqparattyq kitaphana júıesi» KMM-niń (budan ári - KMM) dırektory jáne onyń orynbasarynyń bıýdjettik qarajatty jymqyrǵandyǵy rastaldy.

«Jumys oryndaryna jalǵan ornalasý arqyly qylmystyq is-áreketke mekemeniń ondaǵan qyzmetkerleri men mekeme basshylarynyń týystarynyń qatystylyǵy anyqtaldy.

Jalaqy jáne basqa da tólemder KMM-niń basshylyǵy jáne basqa da qyzmetkerlerdiń banktik shottaryna jalǵan aryzdardyń negizinde aýdarylyp otyrǵan», - dedi vedomstvodan.

Tekserý nátıjeleri men jınaqtalǵan dáleldemeler sotqa deıingi tergep-tekserý júrgizý úshin Sybaılas jemqorlyqqa qarsy is-qımyl departamentine joldandy.

Eki aı ishinde qylmystyq isti tergep-tekserý aıaqtalyp, aıyptaý aktisimen sotqa jiberildi.

«Kókshetaý qalalyq sotynyń 2021 jylǵy 16 shildedegi úkimimen mekeme dırektory men onyń orynbasaryna jalpy somasy 3.8 mıllıon teńge kóleminde aıyppul salyndy. Atalǵan tulǵalar ómir boıy memlekettik qyzmette jáne uıymdarda qyzmet atqarý quqyǵynan aıyryldy.

Sot úkimi 2021 jylǵy 3 tamyzda zańdy kúshine endi», - dep tolyqtyrdy vedomstvodan.