Aqmola oblysynyń Qorǵaljyn aýdanynda halyqtyń 95 paıyzy vaktsınatsııalandy

KÓKShETAÝ. QazAqparat - Aqmola oblysynda halyqty koronavırýs ınfektsııasyna qarsy ımmýndaý jalǵasýda, dep habarlaıdy QazAqparat tilshisi oblystyq ishki saıasat basqarmasyna silteme jasap.

Vaktsınatsııalanǵan turǵyndar sany boıynsha oblysta Qorǵaljyn aýdany kósh basynda keledi. Mundaǵy halyqtyń 95 paıyzdan astamy egildi.

Aýdan ákiminiń orynbasary Daryn Sabyrǵalıdiń aıtýynsha, óńirde ekpe alǵysy keletinder sany kún saıyn artyp keledi.

«Búgin biz bárimiz vaktsınanyń koronavırýstyq ınfektsııaǵa qarsy eń tıimdi qural ekendigine kýá bolyp otyrmyz. Qıyn jaǵdaıǵa qaramastan, bizdiń turǵyndar tynyshtyqty saqtap, alǵa jyljýdy jalǵastyrýda», - dep atap ótti ol.

Sonymen birge, aýdanda turǵyndardy yntalandyrý boıynsha is-sharalar júrgizilýde. Qyrkúıektiń 2-4 kúnderi aralyǵynda vaktsınatsııalanǵan aýdan turǵyndary arasynda aýyl sharýashylyǵy taýarlarynyń utys oıyndary ótkizilip, yntalandyrý syılyqtary berildi.

Halyqtyń basym bóligin ımmýndaý Qorǵaljyn aýylynyń ortalyq alańynda aýyl sharýashylyǵy taýarlaryn óndirýshilerdiń qatysýymen jármeńke uıymdastyrýǵa jáne ótkizýge múmkindik berdi. Jergilikti mádenıet úıiniń qyzmetkerleri de kelýshilerge merekelik kóńil-kúı syılady. Bıylǵy kúzdegi alǵashqy jármeńkede aýyl turǵyndary tómen baǵamen bıdaı, kókónis, jemis-jıdek, dándi daqyldar jáne mal azyǵyn satyp aldy.

Aıta keteıik, Aqmola oblysynda turǵyndarǵa koronavırýsqa vaktsınanyń birinshi komponenti 64,4 paıyz , ekinshi komponenti 53,8 paıyz egildi.