Aqmola oblysynyń kolledjderine qoldanbaly bakalavrıat engizilýde
KÓKShETAÝ. QazAqparat - Kókshetaý qalasynda qoldanbaly bakalavrıatty engizý máselesine arnalǵan respýblıkalyq semınar ótti, dep habarlaıdy QazAqparat tilshisi.
Qazirgi kezde Aqmola oblysyndaǵy 6 kolledjde qoldanbaly bakalavrıatty engizý jumystary júrgizilýde. Bul kolledjderdiń túlekteri eńbek naryǵynda tehnıkalyq jáne kásiptik bilim alyp shyqqan stýdentterden góri eńbek naryǵynda joǵary suranysqa ıe bolady.
Qoldanbaly bakalavrıatty engizý eńbek naryǵynda básekelestik ortany qurýǵa múmkindik beredi.
Aqmola oblystyq Bilim basqarmasynyń basshysy Talǵat Júnisovtiń aıtýynsha, qoldanbaly bakalavrıat stýdentterge JOO odan ári eki jyldyq baǵdarlama boıynsha bilimin jetildirýge múmkindik ashady.
«Qazirgi kezde óńirde 33 kolledj bolsa, onyń 26-y memlekettik. Joǵary alty kolledjde 9 mamandyq boıynsha qoldanbaly bakalavrıat engizilýde. Azamattyq qorǵanys joǵary kópbeıimdi kolledji bul baǵytta jumys istep jatqan jalǵyz jekemenshik mekeme», - deıdi Talǵat Júnisov.
Atalmysh kolledjde synaq retinde «Dene shynyqtyrý jáne sport», «Bastaýysh bilim» jáne «Mektepte deıingi bilim men tárbıe» baǵdarlamalary boıynsha qoldanbaly bakalavrıat mamandyqtary oqytylady.
Azamattyq qorǵanys joǵary kópbeıimdi kolledj prezıdenti Qasym Shoqan atap ótkendeı, qazirgi kezde bilim ordasynda «Órt qaýipsizdigi» jáne «Tótenshe jaǵdaılardan qorǵaný» mamandyqtary boıynsha eki baǵdarlama ázirlenýde.
«Biz Shoqan Ýálıhanov atyndaǵy Kókshetaý memlekettik ýnıversıtetimen jáne Kókshetaý tehnıkalyq ınstıtýtymen qoldanbaly bakalavrıatty engizý boıynsha áriptestik ornatyp otyrmyz. Sonymen qatar, kolledj oqytýshylary men stýdentteriniń biliktiligin arttyrý boıynsha jáne stýdentterdiń akademııalyq mobıldiligi sheńberinde alys-jaqyn shetelderdiń joǵary oqý oryndarymen áriptestik baılanys ornatý jóninde kelissózder júrgizýdemiz», - deıdi Qasym Shoqan.
