Aqmola oblysynyń qaı aýdandarynda jańa emhanalar ashylady

ASTANA. QazAqparat – Bıyl Aqmola oblysynyń birneshe aýdanynda jańa medıtsınalyq mekemeler ashylady. Bul týraly búgin oblys ákimi Ermek Marjyqpaev Ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

Densaýlyq saqtaý salasynda júrek-qan tamyrlary jáne onkologııalyq aýrýlardy emdeý, medıtsınalyq mekemelerdiń ınfraqurylymyn salý jáne nyǵaıtýǵa basa mán berilýde. «Aýyldyq densaýlyq saqtaýdy jańǵyrtý» ulttyq jobasy sheńberinde 38 aýylda ambýlatorııalyq-emhanalyq uıymdar salý kózdelgen

, - dedi E. Marjyqpaev.

Budan bólek, Stepnogorsk jáne Atbasar kópsalaly qalalyq aýrýhanalaryn túbegeıli jańǵyrtý josparlanýda.

Bul obektilerdi engizý normatıvterge sáıkes, aýyl turǵyndaryn medıtsınalyq kómekpen qamtýdy edáýir arttyrady. Sondaı-aq bıyl 3 nysannyń qurylysyn aıaqtaý josparlanýda, olar: Tselınograd aýdany Qoıandy aýylynda 50 adam qabyldaıtyn alǵashqy medıtsınalyq-sanıtarlyq kómek ortalyǵy, Sochınskoe aýylyndaǵy medıtsınalyq pýnkt jáne Atbasar aýdany Novoselskoe aýylyndaǵy feldsherlik-akýsherlik pýnkt. Birjan Sal aýdany Stepnıak qalasynda jańa aýrýhana qurylysy bastaldy

, - dep túsindirdi óńir ákimi.

Spıkerdiń aıtýynsha, 7 nysanǵa kúrdeli jóndeý júrgizý jáne 10 jobalaý-smetalyq qujattamany ázirleý kózdelgen.

Oǵan qosa jaqyn arada búkil oblys úshin mańyzdy joba – Kókshetaý qalasynda 630 oryndyq zamanaýı kópbeıindi aýrýhana salý josparlanýda. Bul joba Densaýlyq saqtaý mınıstrligi men túrik seriktester arasyndaǵy memlekettik-jekeshelik áriptestik aıasynda iske asyrylyp jatyr. Bıyl materıaldyq-tehnıkalyq bazany nyǵaıtý úshin 5 mlrd teńgege 46 dana qymbat jabdyqty satyp alý josparlanǵan.

, - dep tolyqtyrdy E. Marjyqpaev.

Sońǵy úsh jylda oblys boıynsha dárigerlik kadrlar tapshylyǵy 2 esege jýyq tómendegen

(2019 jylǵy 437-den 2022 jylǵy 244-ke deıin).

Jalpy, densaýlyq saqtaý júıesinde medıtsınalyq kómektiń sapasyn arttyrý, sábıler óliminiń, áleýmettik mańyzy bar aýrýlardan bolatyn ólim-jitim kórsetkishterin tómendetý, ana ólimine jol bermeý jónindegi barlyq josparlanǵan is-sharalar jalǵasady

, - dedi Ermek Marjyqpaev.