Aqmola oblysynyń ishki saıasat máseleleri alqa májiliste talqylandy
KÓKShETAÝ. QazAqparat - Ótken jyly Aqmola oblysynda ıdelogııa salasynda 120 myńnan astam shara ótkizildi.
Bul týraly Aqmola oblystyq ishki saıasat basqarmasynyń alqa májilisinde aıtyldy, dep habarlaıdy «QazAqparat» HAA tilshisi.
Oblys ákiminiń orynbasary Nurlan Nurkenovtiń tóraǵalyǵymen ótken sharaǵa oblys aýdandarynyń jáne Stepnogorsk, Kókshetaý qalalary ákimderiniń orynbasarlary, ishki saıasat bólimderiniń basshylary men BAQ ókilderi qatysty. 
Oblystyq ishki saıasat basqarmasynyń basshysy Aına Mysyrálimova óz baıandamasynda oblystaǵy buqaralyq aqparat quraldarynyń jumysy, ondaǵy jarııalanǵan materıaldardyń shyǵýy, memlekettik satyp alýlar máseleleri, elektrondy BAQ-tardaǵy maqalalardyń sapasy men úkimettik emes uıymdardyń jumysy jaıynda aıtyp berdi. Onyń sózine qaraǵanda, oblys BAQ-tarynda Elbasynyń saıasatyn júzege asyrý, memlekettik baǵdarlamalardy nasıhattaý boıynsha materıaldar júıeli berilip turady. Elimiz úshin 2016 jyl el Táýelsizdiginiń 25 jyldyǵymen este qaldy. Mereıli mereke jylynda Aqmola oblysynyń ishki saıasat salasynda 120 myńnan astam is-shara ótkizilipti.
Sonymen qatar, shara barysynda Aqmola oblystyq jastar saıasaty máseleleri basqarmasynyń basshysy Rınat Gallıamov pen din isteri basqarmasy basshysynyń mindetin atqarýshy Bolat Qasenovtiń jáne UQK Aqmola oblysy boıynsha departamentiniń qyzmetkeri Sergeı Cheremnevtiń baıandamalary tyńdaldy.
Osy rette, alqa májilisin qorytyndylaǵan Aqmola oblysy ákiminiń orynbasary Nurlan Nurkenov úkimettik emes uıymdarmen jumysty jandandyrýdy, jastar saıasaty máselelerine qarajatty tıisti deńgeıde bólýdi, ekstremızm men terrorızmge qatysty, din salasyna baılanysty tıisti jumystardy ýaqytynda jáne nátıjeli júrgizýdi tapsyrdy.
