Aqmola oblysynyń eksport úlesi 31 paıyzǵa artty
KÓKShETAÝ. QazAqparat - Bıylǵy birinshi toqsanynda Aqmola oblysynyń syrtqy saýda aınalymy 212,8 mıllıon AQSh dollaryn qurady. Bul kórsetkish ótken jyldyń sáıkes kezeńimen salystyrǵanda 14,7 paıyzǵa artyp otyr, dep habarlaıdy QazAqparat tilshisi Aqmola oblysynyń kásipkerlik jirne ónerkásip basqarmasynyń baspasóz qyzmetine silteme jasap.
Syrtqy saýda aınalymynyń ishinde eksport kólemi 105,6 mıllıon AQSh dollaryn (31 paıyz ósimi), ımport kólemi 107,2 mıllıon AQSh dollaryn (2,3 ósim) qurady. Oblys bıdaı jáne tuqym, un, et, sút ónimderi, jumyrtqa, podshıpnık, polıetılendi qap, alkogolsiz sýsyndar eksporttaıdy.
«Et ónimderin Qorǵaljyn aýdanyndaǵy «Astana-Agroprodýkt» et kombınaty «Bakara» brendimen Máskeýdiń saýda oryndaryna jetkizse, «KazBeef» JShS Reseıdiń birqatar óńirlerine eksporttaıdy. Sonymen qatar, «Milk Project» JShS-niń sút ónimderi men «Kókshetaý mıneraldy sýlary» AQ-niń «Turan» brendimen shyǵarylatyn alkogolsiz sýsyndaryna reseıde suranys joǵary. Al, «QazGerQus» JShS ónimderin Ortalyq Azııa jáne Taıaý Shyǵys (Tájikstan, Túrkimenstan jáne Pákistan) elderiniń naryǵyna shyǵarady», dep kórsetilgen habarlamada.
Jalpy, Aqmola oblysynda «EPK-Stepnogorsk», «Tynys» AQ, «Asyl-Arman», «Kolýton-95», «Ýrojaı» JShS tárizdi kásiporyndar eksportpen aınalysady.
Eske sala keteıik, aǵymdaǵy jyldyń alǵashqy tórt aıynda ónerkásip ónimderiniń kólemi 192,2 mıllıard teńgeni qurady. Ótken jyldyń sáıkes kezeńimen salystyrǵanda ónerkásip ónimderiniń naqty kólem ındeksi 104,6 paıyz boldy.
