Aqmola oblysynyń dıqandary kúzgi egin oraǵyna kiristi
KÓKShETAÝ. QazAqparat - Aqmola oblysynyń dıqandary kúzgi egin oraǵy naýqanyna kiristi, dep habarlaıdy QazAqparat tilshisi.
Oblystyq aýyl sharýashylyǵy basqarmasynyń málimetinshe, búgingi kúni oblysta 52,3 myń gektardyń egini orylyp, 40,6 myń gektary bastyryldy.
«Oblys boıynsha ázirge ár gektardan orta eseppen 9,4 tsentnerden astyq jınalýda. Bulandy aýdanynda gektar berekesi 14,1 tsentnerden aınalýda. Oraq naýqanyna astyqty óńirler Jarqaıyń, Jaqsy jáne Atbasar aýdandarynyń dıqandary qyzý kirisip ketti. Ózge aýdandardyń dıqandary da erte pisetin egin alqabyn destege túsire bastady», - deıdi aýyl sharýashylyǵy basqarmasynan.
Eske sala keteıik, bıylǵy jyly aqmolalyq dıqandar 4446,7 myń gektarǵa dándi jáne burshaqty daqyldar, 254 myń gektarǵa maıly daqyldar ekken.
