Aqmola oblysynyń burynǵy bas dárigeri jemqorlyqqa kúdikpen ustaldy
KÓKShETAÝ. QazAqparat - Aqmola oblysy Densaýlyq saqtaý basqarmasynyń burynǵy basshysy Súlen Іlııasov bóten múlikti ıemdendi nemese jymqyrdy dep kúdikke alyndy, dep habarlaıdy QazAqparat tilshisi.
Aqmola oblystyq sotynyń baspasóz qyzmetiniń málimetinshe, Kókshetaý qalasynyń tergeý sotynyń qaýlysymen 2021 jylǵy 1 sáýirde kúdikti Súlen Іlııasovqa qatysty eki aı merzimge kúzetpen ustaý túrindegi bultartpaý sharasy sanktsııalandy. Bul qaýlyǵa shaǵym jasalyp, altynshy sáýirde qaıta qaraý úshin Aqmola oblystyq sotyna kelip tústi. Apellıatsııalyq alqa ony úsh jumys kúni ishinde qaraıtyn bolady. Osylaısha, ázirge S.Іlııasovqa qatysty bultartpaý sharasyn sanktsııalaý týraly qaýly zańdy kúshine engen joq.
«Oǵan QR QK 189 babynyń 4 bóligi 2 tarmaǵynda (asa iri mólsherde senip tapsyrylǵan bóten múlikti ıemdený nemese ysyrap etý) kózdelgen qylmystyq quqyq buzýshylyq jasady dep kúdik keltirilgen. Bul aýyr sybaılas jemqorlyq qylmystar sanatyna jatady jáne baptyń sanktsııasy 10 jyldan astam bas bostandyǵynan aıyrýdy kózdeıdi», - dep túsindirdi Aqmola oblystyq sotynyń aqparattyq qamtamasyz etý bóliminiń basshysy Kúlásh Domalaqova.
Oblystyq densaýlyq saqtaý basqarmasynyń baspasóz qyzmetinen málim etkendeı, Súlen Іlııasov aǵymdaǵy jyldyń aqpan aıynyń basynda óz erkimen jumystan ketken.
