Aqmola oblysynyń Bulandy aýdanynda kezekte turǵan 20 adam baspanaly boldy
Osynyń arqasynda óńirde baspanaly bolǵandar sany kóbeıip keledi, dep habarlaıdy QazAqparat tilshisi oblystyń ishki saıasat basqarmasyna silteme jasap.
Jazdyń alǵashqy aıynyń birinshi kúni Nur-Sultan qalasy men oblys ortalyǵyn baılanystyratyn kúre joldyń boıynda ornalasqan Makınsk qalasynda kezekte turǵan 20 adam baspanaly boldy. Olarǵa «Nurly jer» memlekettik baǵdarlamasynyń «Shańyraq» baǵyty boıynsha jańa páterlerdiń kiltteri tapsyryldy.
«Búgin bárimiz úshin aıtýly kún. Qazaqstan Táýelsizdiginiń 30 jyldyǵyn merekeleý sheńberinde jańa páterdiń kiltin alyp otyrsyzdar. Qurylys salasynda qoljetimdi baspana salý óte mańyzdy. Elbasy bekitken «Nurly jer» memlekettik baǵdarlamasy boıynsha jyl saıyn myńdaǵan otbasy kópten kútken baspanalaryna qol jetkizýde», - dedi aýdan ákimi Talǵat Erseıitov.
Sonymen qatar, bıyl aýdanda halyqtyń áleýmettik osal toptaryna arnalǵan 60 jáne 24 páterlik eki turǵyn úıdiń qurylysyn aıaqtaý josparlanǵan.
Qurylys basqarmasynyń málimetinshe, ótken jyly oblysta 574 myń sharshy metr turǵyn úı paıdalanýǵa berildi. Respýblıkalyq jáne oblystyq bıýdjet qarajaty esebinen 71 kóppáterli turǵyn úı salý josparlanǵan. Bul degenimiz 3061 páter. Búginde 1982 páterlik 44 turǵyn úıdiń qurylysy júrgizilýde.
Aıta keteıik, egemendik jyldary óńirde halyqty turǵyn úımen qamtamasyz etý jónindegi mindetterdi sheshýge baǵyttalǵan kóptegen memlekettik baǵdarlamalar júzege asyryldy.
