Aqmola oblysynyń birneshe eldi mekeninde alkogol ónimderin zańsyz óndirýshiler ustaldy
Aqmola jáne Soltústik Qazaqstan oblystarynyń tutynýshylaryna satý maqsatynda Stepnogorsk qalasynda bir top adam jalǵan esepke alý-baqylaý tańbalaryn paıdalanyp, zańsyz alkogoldik ónimderdi quıatyn jasyryn tsehtar uıymdastyrǵan.
Şýche, Kókshetaý, Stepnogorsk jáne Aqkól qalalarynda tintý barysynda alkogol ónimderin óndirýge arnalǵan jabdyqtar, ydystar, sondaı-aq ártúrli ataýdaǵy satýǵa daıyndalǵan 17 myńnan astam bótelke daıyn alkogoldik sýsyn, 3 500 lıtrge jýyq alkogol jáne 40 myńnan astam jalǵan esepke alý-baqylaý markalary tabylyp, tárkilendi.
Sonymen qatar, qylmystyq jolmen tabylǵan 2 mln teńgeden astam aqsha, sondaı-aq 3 avtokólik tárkilendi.
Qazirgi ýaqytta sotqa deıingi tergeý amaldary júrgizilip jatyr.
QR QPK 201-babyna sáıkes tergeý múddesindegi ózge de málimetter jarııa etilýge jatpaıdy.
