Aqmola oblysynyń birqatar aýdanynda koronavırýsqa qarsy vaktsınatsııa aıaqtaldy

NUR-SULTAN. QazAqparat – Aqmola oblysynyń birqatar aýdanynda turǵyndardy koronavırýs ınfektsııasyna qarsy vaktsınalaý aıaqtaldy. Bul týraly Aqmola oblysy ákiminiń orynbasary Aına Mysyrálimova aıtty, dep habarlaıdy QazAqparat tilshisi.

«Vaktsınatsııaǵa qatysty aıtar bolsam, ekpeniń 1-komponenti shamamen 300 myń adamǵa salyndy. Bul - ekpe alýǵa tısti halyqtyń 69,1 paıyzy. Al ekinshi komponent 250 myńnan astam adamǵa nemese ekpe alýy qajetti turǵyndardyń 61,4 paıyzyna salyndy. Atalǵan jumys jergilikti atqarýshy organdardyń, oblys basshylyǵynyń turaqty baqylaýynda. Koronavırýs ınfektsııasynyń aldyn alý jáne ózara is-qımyl jónindegi vedomstvoaralyq komıssııa otyrysy únemi ótkiziledi», - dedi ol ortalyq kommýnıkatsııalar qyzmetindegi baspasóz máslıhatynda.

Onyń atap ótýinshe, sońǵy aılardyń ishinde óńirde vaktsınatsııaǵa baılanysty halyqpen jumys kúsheıtildi.

Ekpe brıgadalarynyń sany 30-dan 130-dan astamǵa deıin ulǵaıdy.

Vaktsınatsııa jumysyna 260 ekpe pýnkti men utqyr brıgadalar jumyldyrylǵan.

Al oblystyń shalǵaı aýyldarynyń turǵyndaryn vaktsınalaý úshin 11 jyljymaly keshen jumys istep jatyr.

«Bizde halyq sany az aýdandar da bar. Onda jospar sheginde halyqty vaktsınatsııalaý aıaqtaldy. Jumysty jalǵastyryp jatyrmyz jáne bosaǵan jyljymaly medıtsınalyq keshenderdi onyń qyzmetin qajetsinip otyrǵan eldi mekenderge jiberip jatyrmyz», - dedi Aına Mysyrálimova.