Aqmola oblysynyń basshysy úzdik qurylysshylardy marapattady
KÓKShETAÝ. QazAqparat - Aqmola oblysynda Qurylysshylar kúnine oraı salanyń bir top mamany tós belgilermen, medaldarmen jáne alǵys hattarmen marapattaldy, dep habarlaıdy QazAqparat tilshisi.
Merekelik sharaǵa jınalǵan jurt aldynda quttyqtaý sóz sóılegen oblys əkimi Málik Myrzalın kóptegen ǵasyrdan beri qurylysshy mamandyǵy erekshe syı-qurmetke ıe ekenin aıtyp ótti.
"Memleket basshysy óz sózinde turǵyn úı qurylysy ekonomıkamyzdyń jańa lokomotıvi bolyp tabylatynyn aıtty. Sizder «Nurly jol», «Nurly jer», Údemeli ındýstrııalyq-ınnovatsııalyq damý baǵdarlamalaryn júzege asyrýǵa belsene qatysyp kelesizder. Qurylysshylar eńbeginiń arqasynda Kókshetaý qalasynyń kórki ózgerdi. Qurylys qarqyny artyp, ǵımarattardy qalpyna keltirý belsendi júrgizilýde. Birinshi jartyjyldyqta óńirde júrgizilgen qurylys kólemi ótken jylǵy sáıkes merzimmen salystyrǵanda 101,5 paıyzdy qurady. Bıylǵy jyly 2 myńnan astam páter paıdalanýǵa berildi. Jyl sońyna deıin bıýdjet qarjysy esebinen taǵy 860 páterdi paıdalanýǵa berý josparlanǵan. Aǵymdaǵy jyly áleýmettik salanyń 34 nysanynyń qurylysyna 9,5 mıllıard teńge bólindi. Kókshetaý qalasyndaǵy Neke qııý saraıy osy aıdyń ishinde paıdalanýǵa beriledi. Saryarqa shaǵyn aýdany kóz aldymyzda ósip keledi. Kelesi jyly bul shaǵyn aýdanda 900 oryndyq mektep paıdalanýǵa beriledi", - degen oblys basshysy «Qazaqstannyń qurmetti qurylysshysy» tósbelgisimen «Namys» kompanııasynyń bas dırektory Sáken Jumanalındi, «Kokshevodokanalproekt» seriktestiginiń dırektory Talǵat Táshimovti, «Jaqııa» seriktestigi dırektorynyń orynbasary Rýslan Týmgoevty jáne «Insekt» seriktestigi bóliminiń basshysy Maıra Igenbaevany marapattady.
Sondaı-aq «Eńbek ardageri» medali «Koksheelektromontaj» seriktestiginiń dırektory Omar Saryjigitovke, «Kokshetaý gorselproekt» seriktestigi bóliminiń basshysy Aleksandr Lykovqa, «Aqmola Geodezııa» seriktestiginiń tehnıkalyq dırektory Aleksandr Grıgorevke tabystaldy. Budan bólek, aımaq basshysynyń atynan eńbek ardagerlerine gúl shoqtary tartý etildi.
Saltanatty shara merekelik kontserttik baǵdarlamamen jalǵasyn tapty.
