Aqmola oblysynyń bas sanıtarlyq dárigeriniń qaýlysy kúshin joıdy
KÓKShETAÝ. QazAqparat - «Aqmola oblysynyń aýmaǵynda karantındik shekteý sharalaryn odan ári kúsheıtý týraly» Aqmola oblysynyń Bas memlekettik sanıtarlyq dárigeriniń 2020 jylǵy 28 jeltoqsandaǵy № 301 qaýlysynyń kúshi joıyldy. Buǵan óńirdiń bas sanıtarlyq dárigeriniń jańa qaýlysy sebep boldy, dep habarlaıdy QazAqparat tilshisi.
Jańa qaýlyǵa sáıkes óńirde otbasylyq, estelik (banket, úılený toı, mereıtoı, duǵa) jáne kópshilik jınalatyn ózge de is-sharalardy, onyń ishinde úıde ótkizýge jáne oǵan barýǵa tyıym salynyp otyr. Sonymen birge, jerleý kezinde 2 metr qashyq saqtalyp, (otbasy músheleri) 30 adamnan artyq jınalýǵa jol berilmeıtindigi aıtylǵan.
Merekelik, sport, mádenı-kópshilik is-sharalardy ótkizýge, erteńgilik, merekelik korporatıv uıymdastyrýǵa 2020 jylǵy 30 jeltoqsannan bastap 2021 jylǵy 5 qańtarǵa deıin tyıym salyndy.
Sondaı-aq, oıyn-saýyq mekemeleri (karaoke, bılıard, boýlıng, kompıýter klýby, túngi klýb, attraktsıon), býkmeker keńseleri qyzmetine tyıym salynyp otyr.
«Oblysaralyq, qalaaralyq avtobýs (shaǵynavtobýs) qozǵalysyn, týrıstik tasymalyna ruqsat etiledi. Jeke avtokólikpen tek óńirler arasynda júrip-turýǵa ruqsat beriledi», - dep kórsetilgen qujatta.
Budan bólek, belgilengen talaptardy saqtaı otyryp jáne ujymdyq is-sharalardy ótkizbeı dinı obektilerdiń (meshit, shirkeý, sobor, sınagoga jáne t. b.) qyzmetine ruqsat berilip otyr. Al, kitaphana, murajaı, gúlder dúkeni, fotosalon jumys isteıdi, alaıda teatr men kınoteatr qyzmeti toqtatylmaqshy. Azyq-túlik jáne azyq-túlik emes ashyq bazarlar tek jeksenbi kúni ǵana jumys istemeıdi.
Qaýlyda kórsetilgendeı, jol boıyndaǵy servıs obektileri (qoǵamdyq tamaqtandyrý jáne saýda) qyzmetine ruqsat beriledi, olar saǵat 00:00-den 07:00-ǵa deıin ǵana tamaqty syrtqa shyǵarý arqyly sata alady. Fıtnes ortalyqtary, jattyǵý zaldary men sporttyq-saýyqtyrý ortalyqtary senbi jáne jeksenbi istemeıdi, qalǵan kúnderi kúnderi aldyn ala jazylý boıynsha kelýshi qabyldaıdy, oryn sanyn 50 paıyzdan asyrmaı jáne bir adamǵa 5 sharshy metrden kem emes oryndy qamtamasyz etýi tıis. Qoǵamdyq kóliktiń jumysyna (qarbalas sátte avtobýs sanyn ulǵaıtý, kúlli esikterdi ashý, adamdardy otyratyn oryn sany boıynsha otyrǵyzý ) ruqsat beriledi.
Memlekettik organdardyń, kvazımemlekettik sektor organdarynyń, ulttyq kampanııalardyń, ózge de uıymdardyń, sondaı-aq kásipkerlik sýbektileriniń qyzmetine ruqsat beriledi. Qyzmetkerlerdiń keminde 60 paıyzy qashyqtyqtan jumys atqarýy tıis.
Medıtsınalyq ortalyqtardyń, stomatologııalyq klınıkalardyń jáne kabınetterdiń qyzmetine (aldyn ala jazylý boıynsha), dárihanalardyń qyzmetine ruqsat beriledi.
Sonymen birge, qaýylda 2020-2021 oqý jylynyń úshinshi toqsanynan bastap kontıngenti 300 oqýshyǵa deıin synypta balalar sany 15-ke deıin qala jáne aýyl mektepterinde dástúrli formatta oqıtyny jazylǵan. Ata-ana ótinishi boıynsha synyptarda 15 oqýshydan artyq bolmaıtyn jalpy bilim beretin mektepterde kezekshi synyptarda 1-den 5-synypty, halyqaralyq mektepterde-7-synypty qosa alǵanda oqıdy.
Qaýly 2020 jylǵy 30 jeltoqsan kúni saǵat 07:00-den bastap kúshine enedi.
