Aqmola oblysynyń barlyq óńirleri memlekettik qoldaýǵa ıe boldy
KÓKShETAÝ. QazAqparat - Bıylǵy 2019 jyly «Bıznestiń jol kartasy-2020» baǵdarlamasyn júzege asyrý sheńberinde Aqmola oblysynda memlekettik sýbsıdııalaý alý úshin jalpy quny 3 mıllıard teńgege 68 joba qoldaý tapty, dep habarlaıdy QazAqparat tilshisi oblystyq kásipkerlik jáne ónerkásip basqarmasynyń baspasóz qyzmetine silteme jasap.
Shaǵyn jáne orta kásipkerlikti damytý bólimi basshysynyń málimetinshe, «Bıznestiń jol kartasy-2020» baǵdarlamasy qolǵa alynǵannan beri (2010 jyldan bastap) Aqmola oblysynda 140,4 mıllıard teńgeniń 1182 jobasy qoldaý tapty.
«Memlekettik qoldaý sharalarymen oblystyń barlyq óńirleri qamtyldy, onyń ishinde Kókshetaý, Stepnogor qalalary men Býrabaı, Tselınograd, Zerendi, Atbasar, Bulandy jáne Aqkól aýdandary belsendi qatysty», - dep atap ótti Aqmola oblystyq kásipkerlik jáne ónerkásip basqarmasy Shaǵyn jáne orta kásipkerlikti damytý bóliminiń basshysy Sandýǵash Alshynbaeva.
Onyń sózinshe, óńirde memlekettik baǵdarlama boıynsha qarjylaı kómek alǵan iri kásiporyndardyń arasynda «Novopek» JShS, «Elim-aı 2005» JShS, «Aqmola-Fenıks» AQ, «Makınsk qus fabrıka» JShS, «Impýls ST» JShS, «Avıtsenna-Býrabaı» JShS, «Askop» JShS bar.
«2019 jyly «Bıznestiń jol kartasy-2020» baǵdarlamasyn júzege asyrý sheńberinde óńirde memlekettik sýbsıdııa alý úshin jalpy quny 3 mıllıard teńgege 68 joba qoldaý tapty. «Damý» qory arqyly jalpy somasy 1,9 mıllıard teńgege 69 kepildeme berildi», - dep tolyqtyrdy S. Alshynbaeva.
