Aqmola oblysynyń barlyq derlik aýdanynda sabaqtar bolǵan joq
KÓKShETAÝ. QazAqparat - Aqmola oblysynda qatty jel men aqtútek borannyń saldarynan birqatar aýdanda sabaqtar toqtatyldy, dep habarlaıdy QazAqparat tilshisi.
Oblystyq bilim basqarmasynyń deregi boıynsha, Bulandy, Býrabaı, Esil, Eńbekshilder, Zerendi, Sandyqtaý aýdandary, Stepnogor jáne Kókshetaý qalalarynda birinshi aýysymda oqıtyn balalar úshin sabaq kestesine ózgerister engizilgen joq, al qalǵan 11 aýdanda oqýlar toqtatyldy. Sondaı-aq Esil, Jarqaıyń jáne Bulandy aýdandaryn esepke almaǵanda, ózge aýdandardyń barlyǵynda ekinshi aýysymda oqıtyn oqýshylar úshin sabaq bolǵan joq.
12 qańtar kúngi oqý protsesine qatysty aqparat tek erteń tańerteń ǵana belgili bolady.
Degenmen, bilim basqarmasynyń saıtynda qandaı jaǵdaı sabaq bolmaıtyny kórsetilgen: «Bilim berý mekemelerinde sabaq kelesi jaǵdaıda keıinge shegeriledi. Aýa temperatýrasy 25 gradýstan tómen jáne jeldiń jyldamdyǵy sekýdyna 2 metr nemese odan joǵary bolǵan jaǵdaıda 1-4 synyptarǵa. 27 gradýstan tómen jáne jeldiń jyldamdyǵy sekýndyna 2 metr nemese odan joǵary bolǵan jaǵdaıda 1-9 synyptarǵa, 30 gradýstan tómen jáne jeldiń jyldamdyǵy sekýndyna 2 metr nemese odan joǵary bolǵan jaǵdaıda 1-11 (12) synyptarǵa, kásibı mektepter (lıtseı), kolledjdiń 1-kýrs stýdentterine, sondaı-aq jeldiń jyldamdyǵy sekýndyna 2 metrden asyp, aýa temperatýrasynyń kórsetkishi 5 gradýstan tómen tússe keıinge shegeriledi».
