Aqmola oblysynyń aýylynda zamanaýı kabınetteri bar mektep ashyldy
KÓKShETAÝ. QazAqparat - QR Tuńǵysh Prezıdenti kúni qarsańynda Tselınograd aýdanynyń Qyzylsýat aýylynda jańa mektep paıdalanýǵa berildi, dep habarlaıdy QazAqparat tilshisi.
Bilim ordasynyń ashylýy saltanatyna aýdan ákimi Malǵajdar Tatkeev qatysyp, oqýshylar men ustazdardy osynaý qýanyshtarymen quttyqtady.
120 oryndyq mekteptiń qurylysy Astana qalasyna irgeles eldi mekenderdi áleýmettik-ekonomıkalyq damytýdyń keshendi jospary aıasynda júrgizilgen. Ony turǵyzýǵa 423,9 mıllıon teńge qarjy jumsaldy.
Mektep kabınetteri zamanaýı tehnologııamen jabdyqtalyp, olardyń barlyǵyna derlik ınteraktıvti taqtalar ornatylǵan. Eki lıngofondy synyp jumys isteıdi. Eńbek kabınetteri qyz balalardyń qolónerin damytýǵa, is tigýge baýlıtyn jańa tigin mashınalarymen jabdyqtalǵan. Buǵan qosa, úlken sport zaly bar.
Nysannyń jalpy aýmaǵy 3440 sharshy metrdi quraıdy. Ǵımarat avtonomdy jylý berý júıesine qosylǵan. Əleýmettik az qamtylǵan otbasylardyń balalary tegin tamaqtandyrylatyn bolady.
Eske sala keteıik, 2010-2017 jyldar aralyǵynda aýdan boıynsha 18 bilim berý mekemesi (9 mektep jáne 9 balabaqsha) paıdalanýǵa berildi.
