Aqmola oblysynyń aýmaǵy 2023-2024 jyldary gazben qamtamasyz etiledi
KÓKShETAÝ. QazAqparat - Aqmola oblysynyń aýmaǵy 2023-2024 jyldary gazben qamtamasyz etiledi. Bul týraly aımaq basshysy Məlik Myrzalınniń «KazTransGas» AQ bas dırektory Qanat Qurmanalıevpen kezdesýinde aıtyldy, dep habarlaıdy QazAqparat tilshisi.
Qanat Qurmanalıevtiń sózinshe, keler jyldan bastap elimizde «Sary-Arqa» magıstraldy gaz qubyrynyń qurylysy» jobasy bastalady. Atalmysh joba elimizdiń soltústik jəne ortalyq óńirlerin úzdiksiz gazben qamtamasyz etýge baǵyttalǵan.
Magıstraldy gaz qubyrynyń qurylysy 2018-2030 jyldar aralyǵynda «Qyzylorda - Astana», «Astana - Kókshetaý» jəne «Kókshetaý - Petropavl» kestesi boıynsha júzege asyrylady.
«Aqmola oblysynyń aýmaǵyna gaz shamamen 2023-2024 jyldary jetkiziledi. Oblys ákimimen kezdesýde jol boıyndaǵy 50-ge jýyq eldi mekendi gazben qamtamasyz etý josparyn talqyladyq. Mundaǵy «Astana - Kókshetaý» magıstraldy gaz qubyrynyń quny shamamen 48,2 mıllıard teńgeni quraıdy», dedi Qanat Qurmanalıev.
Óz kezeginde aımaq basshysy gaz tartý óńir úshin strategııalyq mańyzy zor sharýa ekenin aıta kele, jobany júzege asyrýǵa əriptes bolýǵa ázirligin bildirdi.
««Sary-Arqa» magıstraldy gaz qubyrynyń qurylysy» jobasyn oblys aýmaǵynda júzege asyrý asa mańyzdy. Gaz qubyryn tartý - bul ınjenerlik ınfraqurylymnyń, óndiris oryndarynyń damýyna septigin tıgizedi. Kómir otynynan gazǵa kóshý ekologııalyq jáne ekonomıkalyq jaǵynan tıimdi bolar edi», - dedi M.Myrzalın.
