Aqmola oblysynyń Aqkól aýdanynda ýchaskelik polıtsııa pýnkti ashyldy
KÓKShETAÝ. QazAqparat - Aqmola oblysynyń Aqkól qalasynda ýchaskelik polıtsııa pýnkti ashyldy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, aýdan ortalyǵynda ornalasqan nysannyń ashylýyna Polıtsııa departamentiniń bastyǵy general-maıor Armanbek Baımýrzın qatysty. Ýchaskelik polıtsııa beketi Aqkól orman sharýashylyǵy, Ernazar, Radovka, Rodnıkı stantsııasy sııaqty eki ákimshilik ýchaske men aýyl turǵyndary úshin qoljetimdi.
Aýdan ákimdigi ýchaskelik polıtsııa pýnktin ashýǵa qoldaý bildirip, sport mektebiniń ǵımaratynan bólme bergen eken. Bul azamattardyń polıtsııaǵa júginý protsesin edáýir jyldamdatady, sondaı-aq olarǵa zańdylyq pen quqyqtyq tártipti buzýshylyqtar týraly ýaqtyly habarlaýǵa múmkindik beredi.
«Qoǵamdyq tártipti qamtamasyz etýde ýchaskelik ınspektorlardyń róli zor. Olar azamattarmen barynsha tyǵyz qarym-qatynasta bolady jáne ákimshilik ýchaskede turǵyndarynyń problemalaryn sheshýde jergilikti atqarýshy organdarǵa kómek kórsetedi. Buryn ýchaskelik ınspektorlar aýdandyq polıtsııa bóliminiń bazasynda jumys istegen. Endi olarǵa shalǵaı ákimshilik ýchaskelerdiń turǵyndaryna jetý jeńil bolady. Ýchaskelik ınspektorlardyń ózderi turǵyndarmen tıimdi jumys isteı alady», - dedi vedomstvodan.
Aıta keteıik, atalmysh ýchaskelik polıtsııa pýnktinde tártip saqshylaryna halyqpen jumys isteýi úshin barlyq jaǵdaı jasalǵan. Qajetti keńse atrıbýttary, monıtor bar, osy arqyly qala kóshelerinde ornalasqan beınebaqylaý kameralarynan tikeleı beıne kórinisterdi baqylap otyrýǵa bolady. Ýchaskelik polıtsııa pýnktine polıtsııa kapıtany Saıat Seıithojın pen qatardaǵy polıtsııa Danııar Sovetov bekitildi.
Osy jerde Polıtsııa departamentiniń bastyǵy general-maıor Armanbek Baımýrzın ýchaskelik polıtsııa ınspektorlarymen birge azamattarǵa jeke qabyldaý ótkizdi.
Qabyldaýǵa kelgen jaqyn mańdaǵy eldi mekenderdiń turǵyndary kóshi-qon, tabıǵatty qorǵaý zańnamasy salasyndaǵy máselelerdi kóterdi, sondaı-aq, ýchaskelik polıtsııa ınspektorlary men ıývenaldy polıtsııa ınspektorlaryna alǵys bildirdi.
Vedomstvodan atap ótkendeı, aldaǵy ýaqytta Aqkól aýdanynda polıtsııa bóliminiń jańa ǵımaratyn salý josparlanyp otyr.
