Aqmola oblysynyń ákimi ustazdardy kásibı merekelerimen quttyqtady
KÓKShETAÝ. QazAqparat - Aqmola oblysynyń Býrabaı kentinde Ustazdar kúnine arnalǵan saltanatty jınalys ótti.
Óńirdiń 200-den astam ustazdar qaýymy bas qosqan sharaǵa aımaq basshysy Sergeı Kýlagın de qatysyp, jınalǵandardy kásibı merekelerimen quttyqtady jáne úzdikterge alǵys hattar men marapattar tabys etti, dep habarlady oblys ákiminiń baspasóz qyzmetinen.
«Bilim salasy qyzmetkerleriniń jumys isteýine tıisti jaǵdaı bolmasa, olarǵa materıaldyq qoldaý kórsetpesek nátıje de bolmas edi. Sondyqtan memleket bilim salasyna jan-jaqty qoldaý kórsetip otyrady. Táýelsizdik alǵan jyldardan bastap oblysta 500-den astam mektepke deıingi mekemeler ashylyp, 41 mektep salyndy. Odan basqa, bıylǵy jyly jańa oqý jylyna qarsy 4 mektep, 1 balabaqsha paıdalanýǵa berilip, Aqkól balalar úıi jóndeýden keıin qaıta ashyldy. Qazan aıynda oblys boıynsha taǵy eki bilim nysanynyń qurylysy aıaqtalyp, paıdalanýǵa beriledi dep josparlanýda. Aǵymdaǵy jyly 17 bilim mekemesine 1,5 mlrd. teńgege kúrdeli jóndeý júrgizildi», - dedi aımaq ákimi.
Sondaı-aq, aımaq basshysy óz sózinde «Úzdik pedagog 2016» respýblıkalyq baıqaýynda úzdik dep tanylǵan J.Mýsın atyndaǵy qazaq pedagogıkalyq kolledjiniń muǵalimi Nurgúl Muqysheva men Kókshetaý qalasy №18 orta mektebiniń orys tili pániniń muǵalimi Aıgúl Kenjebaevalardy da erekshe atap ótti.
«Jaqynda ǵana Astana qalasynda ótken «Úzdik pedagog 2016» respýblıkalyq konkýrsynda oblystyń 2 ustazy oza shapqanyna qýanyshtymyn. Bizdiń oqýshylarymyz da túrli respýblıkalyq jáne halyqaralyq olımpıadalardyń júldegerleri atanýda. Munyń barlyǵy sizderdiń jetistikterińiz. Búgingi mereke kúni sizderge tek jaqsylyq, zor densaýlyq, oqý men eńbekte shyǵarmashylyq tabystar tileımin», - dedi S.Kýlagın.
Eske sala keteıik, bıylǵy jyly 76 aqmolalyq oqýshy zııatkerlik olımpıadalardyń, 126 oqýshy shyǵarmashylyq konkýrstardyń, 108 oqýshy sporttyq jarystardyń júldegeri atandy.
Shara sońy merekelik kontsertke ulasty. 
