Aqmola oblysynyń ákimi sýbsıdııa alýshylardy qatań synǵa aldy
KÓKShETAÝ. QazAqparat - Aqmola oblysynyń ákimi astyq bitik shyǵatyn Esil, Jaqsy jáne Jarqaıyń aýdandarynda bolyp, egin oraǵy jumystarynyń barysymen tanysty, dep habarlaıdy QazAqparat tilshisi oblystyq ishki saıasat basqarmasynyń baspasóz qyzmetine silteme jasap.
Aımaq basshysy atalmysh aýdandardyń aktıvterimen kezdesip, kúzgi egin oraǵy naýqanyn oıdaǵydaı ótkizý, aýyl sharýashylyǵy jerlerin tıimdi paıdalaný máselelerin talqylady. Osy rette, oblys basshysy memleketten bólinip otyrǵan qarjylaı kómek pen senimdi aqtaı almaı otyrǵan aýyl sharýashylyǵy kásiporyndarynyń jumysyn qatań synady. Ásirese, bıylǵy jyly 29 mıllıardtan astam teńge qarjy bólingen atalmysh aýdandardyń aýyl sharýashylyǵy qurylymdarynyń salyq túsiminiń kórsetkishteri kóńil kónshitpeıdi. Jıynda osy qalyptasyp otyrǵan jaǵdaıdy ózgertip, tyǵyryqtan shyǵý jóninde áńgime órbidi.
«Búgingi tańda birqatar aýdandarda qarama-qarsy jaǵdaı oryn alyp otyrǵan jaıy bar. Kóptegen aýyl sharýashylyǵy kásiporyndary iri kólemde sýbsıdııa alyp otyryp, mardymsyz salyq tóleýde. Máselen, Esil aýdanyndaǵy «Álibı-Esil» JShS 250 mıllıon teńge kóleminde sýbsıdııa alsa, onyń 3,5 paıyzyn ǵana salyqqa tólegen. Kásiporynda barlyǵy 17 adam jumys isteıdi. Sonda olar bar-joǵy 19 myń teńge aılyq ala otyryp, barlyǵy 31 myń gektar egistik alqap pen jaılymdy óńdeıdi. Al, 19 myń gektar jeri bar «Moskovskoe» JShS birde bir jumysshy joq. 36 myń gektar jeri bar «Jańa Jer agrofırmasy» JShS de osyndaı jaǵdaı. Esil aýdanynda mundaı kásiporyndar sany 16-ǵa jetedi. Oǵan qosa, eńbekaqy qory nól, birli-ekili jumysshysy bar sharýashylyqtar da kezdesedi», - dedi M.Myrzalın.
Aımaq basshysynyń aıtýynsha, memleket bıýdjetine salyq tóleýde aıtarlyqtaı problemalar bar. Kóptegen sharýashylyqtar memleketten mol sýbsıdııa alǵanyna qaramastan, salyq tóleýden tómen kórsetkish kórsetip otyr.
Máselen, Esil aýdanyndaǵy «Vıktorııa» ShQ, «Kompanııa Orıon plıýs» JShS, «Qarakól AShK» JShS, Jaqsy aýdanynda «Altyn» ShQ, «Podgornoe 1» JShS, «Zaporoje» JShS jáne Jarqaıyń aýdanynda «ATA 1» ShQ, «Jarkaınskaıa Nıva» JShS, «Temirlan» JShS alǵan sýbsıdııalarynyń 0,4-15 paıyzyn ǵana salyq retinde tólegen.
Budan bir ǵana sheshim shyǵarýǵa bolady. ıAǵnı, bul kásiporyndar jumysshylardy zańsyz jaldaý arqyly QR qoldanystaǵy zańnamasynan tys zańsyz jalaqy tólep kelgen. «Kóleńkedegi» eńbekaqydan salyq jáne ózge de tólemder túspeýinen bıýdjetke shyǵyn keltiriledi, áleýmettik baǵdarlamalardy qarjylandyrý, zeınetaqy jáne járdemaqylardy ósirý qarajaty azaıady.
«Meniń salyq, eńbekaqy jáne jerdi tıimdi paıdalaný máseleleri boıynsha suraqtarym bar. Biz qandaı aýdan qansha tabys tabady, olarǵa respýblıkalyq jáne oblystyq bıýdjetten qalaı kómektesý kerek ekenin qarastyramyz. Men sońǵy eki jyldaǵy sandardy salystyra otyryp, osyndaı nátıjeni kórip otyrmyn. 2017 jyly aýdandarǵa 476 mıllıon teńge maqsatty transfertter bólinse, bıylǵy jyly bul kórsetkish 2,5 esege artyp, 1,2 mıllıard teńgeni qurady. Onyń ishinde ótken jyly oblystyq bıýdjetten 450 mıllıon teńge bólinse, bıyl 760 mıllıon teńgege jetti. Biz Esil aýdanyna kómektesýge tyrysamyz, soǵan oraı aýdan da oblys ekonomıkasynyń damýyna óz úlesterin qosýlary tıis dep esepteımiz. Ókinishke oraı, jaǵdaı olaı bolmaı tur. Taǵy da eskertemin, eger memleket kómektesse, tıisinshe oǵan da qaıtarym bolýy kerek», - dedi aımaq basshysy.
Sonymen qatar, kezdesýde Aqmola oblysynyń memlekettik kirister departamentiniń basshysy T.Oshaqbaev memleketten bólingen sýbsıdııanyń maqsatsyz jumsalýyna da jol berilip otyrǵandyǵyn atap ótti.
Aımaq basshysy bul máseleni sheshý úshin qatań sharalar qoldanylatynyn kesip aıtty.
«Biz memlekettik kirister departamentimen aýyl sharýashylyǵy taýar óndirýshilerge salyqtyq mindettemelerdi oryndaý qajettigi týraly túsindirip, eskerttik. Qazirgi kezde aýdandaǵy barlyq sharýashylyq týraly málimet bar. Biz taldaý júrgizdik jáne bul baǵytta tabandy túrde jumys isteıtin bolamyz. Bul mindetterdi aýdan ákimdikteri men memlekettik kirister departamentine birlesip oryndaýdy tapsyramyn. Salyq kóp bolsa, aýdan abattandyrylyp, ınfraqurylymy jaqsaratynyn ár adam túsinýi tıis», - dedi M.Myrzalın.
Aımaq basshysy óńirlerdiń áleýmettik-ekonomıkalyq damýyna úles qosyp kele jatqan úzdik sharýashylyqtardy da atap ótti. Bulardyń arasynda Esil aýdanynda «Qarakól agrofırmasy» JShS, «Tneı Agro» JShS, «Novo-Prırechnoe» JShS, Jarqaıyn aýdanynda «Derjavınskaıa agropromtehnıka» JShS, «Jer 1» JShS, «ABS Jarkól» JShS», Jaqsy aýdanynda «Jańa Jol» JShS, «Zolotaıa Nıva» JShS, «Aıbat» JShS jáne «Túgel-S» JShS bar.
Kezdesý qorytyndysy boıynsha oblys ákimi jaýapty tulǵalarǵa salyq tóleýge enjar qaraıtyn kásiporyndardy anyqtaýdy jáne tıisinshe qatań shara qoldanýdy tapsyrdy.
