Aqmola oblysynyń ákimi Qoıandyda jer telimderiniń zańsyz taratylýyna jol bergenderdi atady

KÓKShETAÝ. QazAqparat - Astananyń irgesindegi Qoıandy aýylynda jer telimderiniń zańsyz taratylýyna aýyl ákimi, ýchaskelik ınspektorlar jol bergen. Bul týraly búgin «2016 jyldyń áleýmettik-ekonomıkalyq damýynyń qorytyndylary jáne 2017 jyldyń negizgi mindetteri» týraly halyq aldynda eseptik kezdesýinde oblys ákimi Sergeı Kýlagın málimet etti, dep habarlaıdy «QazAqparat» HAA tilshisi.

Aımaq basshysynyń aıtýynsha, zańsyzdyqqa jol berip, alaıaqtyq jasaǵandardyń barlyǵy tıisti jazasyn alyp otyr.
«Bul óte kúrdeli másele boldy. Aýyl ákimi, ýchaskelik ınspektorlar jer telimderiniń zańsyz taratylýyna jol bergen. Biraq, biz halyqtyń jaǵdaıyn túsinip, 190 otbasyna sol jer telimderin qaldyrdyq. Bes otbasynyń máselesi áli sheshile qoıylǵan joq. Buǵan jol bergen kináliler zań aldynda jaýap berdi», - dedi oblys ákimi.
Sonymen qatar, aımaq basshysy Astananyń irgesindegi eldimekenderdi keshendi damytý jospary aıasynda 20 jobany júzege asyrý úshin 5,7 mıllard teńge bólingenin atap ótti. Onyń ishinde Maksımovka aýylynda mektep qurylysy, jeti eldimekende qurylys jáne jol ınfraqurylymyn kúrdeli jóndeý, halyqty sapaly aýyz sýmen qamtamasyz etý, sondaı-aq, Tselınograd, Shortandy jáne Arshaly aýdandaryndaǵy segiz aýylda elektrmen jabdyqtaý nysandarynyń qurylysy qarastyrylǵan.