Aqmola oblysynyń ákimi Kókshetaýdaǵy qurylys jumystarynyń barysyn tekserdi
KÓKShETAÝ. QazAqparat- Aqmola oblysynyń ákimi Ermek Marjyqpaev Kókshetaý qalasynyń irgesindegi Krasnoıar kentiniń Nurly kósh shaǵyn aýdanynda kóshelerge júrgizilip jatqan jóndeý jumystarynyń barysymen tanysty, dep habarlaıdy QazAqparat tilshisi ákimdiktiń baspasóz qyzmetine silteme jasap.
Ákimdik baspasóz qyzmetiniń málimetinshe, jospar boıynsha 10800 sharshy metr asfalt tóseý kerek bolsa, búgingi kúnge deıin onyń teń jartysy oryndalypty. Aımaq basshysy barlyq jóndeý jumystaryn qazan aıynyń alǵashqy onkúndiginde aıaqtaýdy tapsyrdy. Al, aýyl turǵyndarymen kezdesýinde Ermek Marjyqpaev keler jyly osynda 280 oryndyq jańa balabaqsha salý josparlanyp, onyń qujattary saraptama jiberilgenin atap ótti.
Aımaq basshysy oblys ortalyǵynda bilim berý nysandarynyń qurylys alańdarynda bolyp, atqarylyp jatqan jumystardy tekserdi. Krasnoıar baǵytyndaǵy joldyń boıynda belgili sebeptermen toqtap qalǵan jańa oqý-tárbıe kesheniniń mekteptiń qurylysyn qyrkúıektiń sońyna deıin jandandyrýdy tapsyrdy. №6 orta mektebiniń jáne №13 «EKOS» ekologııalyq mektep-gımnazııasynyń janynan salynyp jatqan jańa ǵımarattar men Saryarqa shaǵyn aýdanynda qolǵa alynǵan kópqabatty 12 turǵyn úıdiń qazyǵyn qaǵý jumystaryna nazar aýdardy.
Bilim ordalarynyń mańynan boı kóteretin nysandar 300 jáne 420 oqýshyǵa arnalǵan. Al, Saryarqa shaǵyn aýdanynda salynyp jatqan 12 turǵyn úıdiń 8-i nesıege, 4-ýi jalǵa beriletin úıler. Aǵymdaǵy jyly 2 úıdi áleýmettik jaǵynan az qamtylǵan otbasylarǵa, 8 úıdi Turǵyn úı qurylys jınaq bankiniń salymshylary úshin paıdalanýǵa berý josparlanǵan.
Aımaq basshysy merdigerlerge qurylys jumystaryn kestege saı júrgizýdi tapsyrdy.
Qazaqstan men Reseıdiń aımaqaralyq yntymaqtastyǵy forýmy keler jyly Kókshetaýda ótetindigi belgili. Osyǵan baılanysty oblys ortalyǵynda «Bolashaq» saraıy salynady. Qazir nysannyń irgetasyn quıý aldyndaǵy daıyndyq jumystary júrgizilýde. Al, Qopa kóliniń jaǵasynda Qylshaqty ózeni arqyly ótetin kópir salynyp jatyr. Budan bólek, aımaq basshysy kafedraldy sobor jáne ózge de qurylys alańdarynda boldy.
