Aqmola oblysynyń ákimi qaza bolǵan «Ohotzooprom» ınspektorynyń otbasyna kóńil aıtty
KÓKShETAÝ. QazAqparat - Aqmola oblysynyń ákimi Ermek Marjyqpaev qaza bolǵan «Ohotzooprom» ınspektory Qanysh Nurtazınovtyń otbasyna kóńil aıtty, dep habarlaıdy QazAqparat tilshisi.
«Brakonerlerdi ustaý kezinde qaza tapqan «Ohotzooprom» ınspektory Qanysh Nurtazınovtyń otbasyna kóńil aıtamyn. Ekinshi ınspektor, Ospanov Samat, sanavıatsııamen Aqmola oblystyq aýrýxanasyna ushaqpen ushýda, jaǵdaıy birqalypty aýyr. Tez saýyǵyp ketýine tilektespin.
Qylmyskerlerdi izdestirý jedel sharalaryna barlyq Іshki ister salasynyń qyzmetkerleri dabyl boıynsha kóterildi», dep jazdy Ermek Marjyqpaev Instagram-daǵy paraqshasynda.
Aıta keteıik, osyǵan deıin habarlaǵanymyzdaı, 23 shildede shamamen saǵat 11.00-de «Ohotzooprom «ÓB» RMQK Ortalyq óńirlik fılıalynyń ınspektorlary Aqmola oblysy Jarqaıyń aýdanynda kıik atqandardy anyqtaıdy. Brakonerler izine túsken eki ınspektorǵa qarsy oq atady, saldarynan 1976 jylǵy ınspektor kóz jumdy, al, onyń 1975 jylǵy áriptesi jaralanyp, Jarqaıyń aýdandyq aýrýhanaǵa jatqyzylǵan edi.
Osyǵan oraı, arnaıy jedel-tergeý toby qurylyp, kúdiktilerdi ustaý boıynsha keshendi sharalardy qolǵa aldy. Kúdiktilerdi ustaýǵa Jarqaıyń, Esil jáne Jaqsy aýdandarynyń polıtsııa bóliminiń jeke quramy tartyldy. Patrýldik qyzmet narıadynan kúdiktilerdiń kóligine tuspaldaý berildi. Jarqaıyń jáne kórshi aýdandardyń aýmaǵynda 10 blok beket qoıylǵan bolatyn.
Artynsha, bul is QR Іshki ister mınıstri men Aqmola oblystyq PD basshysy baqylaýyna alyndy. Sonymen qatar, atalǵan oqıǵaǵa baılanysty QR QK 99 babynyń 1 bóligi boıynsha qylmystyq is qozǵalǵan bolatyn. Jedel izdestirý sharasy barysynda kúdiktiler Arqalyq qalasynyń 45 jastaǵy turǵyny men onyń 20 jastaǵy balasy ustaldy.
