Aqmola oblysynyń ákimi Esil jáne Jarqaıyń aýdandaryna bardy
KÓKShETAÝ. QazAqparat - Aqmola oblysynyń ákimi Ermek Marjyqpaev Esil jáne Jarqaıyń aýdandarynda bolyp, áleýmettik-óndiristik nysandardyń jumysymen tanysty, dep habarlaıdy QazAqparat tilshisi ákimdiktiń baspasóz qyzmetine silteme jasap.
Esil aýdanynda bolǵanynda aımaq basshysy «Esil Man», «Madııar K» jáne «Zarechnoe» seriktestikteriniń egis alqaptaryn aralap, dıqandarmen kezdesti. Sharýashylyq basshylary tuqym sebý jumystaryn aldaǵy 2-3 kúnniń ishinde aıaqtaýdy josparlap otyrǵandaryn aıtty.
Esil aýdanynda astyq jáne burshaq tuqymdastarynyń egistik alqaby 440 myń gektardy qurasa, Jarqaıyń aýdanynda 635 myń gektar alqapqa tuqym sebý jumystary júrgizilýde. Aýyl sharýashylyǵy taýaryn óndirýshiler tómendetilgen baǵadaǵy janar-jaǵarmaımen tolyq qamtylǵan. Kóktemgi naýqanda joǵary sapaly tuqym qoldanylýda, ásirese jergilikti elıtalyq tuqym sharýashylyqtarynyń ónimi suranysqa ıe. Agrarlyq sharýashylyqtar zamanaýı tehnıkalarmen jabdyqtalǵan.
Kezdesýde oblys ákimi Ermek Marjyqpaev sharýashylyq basshylaryna aýyl sharýashylyǵy mamandaryn dýaldy oqytýdy júzege asyrý sheńberinde Esil qalasynyń Agrotehnıkalyq kolledjimen áriptestik baılanys ornatýǵa shaqyrdy. Bul oqý orny 60 jyldan beri bilikti mamandar daıarlap kele jatqan qara shańyraq. Oqý ornynyń aýmaǵynda 14 ǵımarat ornalasqan, onyń ishinde oqý korpýsy, 5 zerthana, óndiristik sheberhanalar, 2 jataqhana, qoǵamdyq-turmystyq korpýs bar. Munda suranysqa ıe agrotehnıkalyq mamandyqtar boıynsha oblys jastary bilim alýda.
«Men búgin kolledj jumysymen tanystym. Onda oqyp jatqandar bolashaq dánekerleýshiler, mehanızatorlar, traktorshylar. Olardy tájirıbe jınaýǵa shaqyryńyzdar. Áleýetti jumys berýshiler retinde sizder olardyń básekege qabilettiligine múddeli bolýǵa tıissizder. Tájirıbeli tálimgerlerdiń qoldaýymen sizderdiń ozyq tehnıkalaryńyzda jumys isteı otyryp, balalar óz bilimderin qoldaný úshin laıyqty jaǵdaılarǵa ıe bolady degen senimdemin. Agrarlyq salanyń bilikti mamandaryn barlyǵymyz birlese daıyndaýymyz kerek», - dep atap ótti aımaq basshysy.
Jarqaıyń aýdanynda «Jarqaıyń», «Kostychev» seriktestikteri jáne «Amınov» jeke kásipkerliginde atqarylyp jatqan ıgi isterge qanyqty.
Osy rette, aımaq basshysy aýdan ákimderi men sharýashylyq basshylaryna aldyna ala belgilengen kestege saı kóktemgi egis jumystaryn ýaqtyly oryndaýdy tapsyrdy. Sonymen qatar, óńirlerde abattandyrý jáne kógaldandyrý jumystaryn shıratýdy mindettedi.
