Aqmola oblysynyń ákimi BAQ ókilderiniń saýaldaryna jaýap berdi
KÓKShETAÝ. QazAqparat - Jalpy ózime naqty jumys istegen unaıdy. Aımaq basshysy Málik Myrzalın óńirdegi BAQ ókilderimen ótkizgen baspasóz máslıhaty barysynda ózine suraq qoıǵan tilshige osylaı jaýap berdi, dep habarlaıdy «QazAqparat» HAA tilshisi.
Baspasóz máslıhaty kezinde óńirdiń áleýmettik-ekonomıkalyq damýy týraly baıandaǵan aımaq basshysy jýrnalısterdiń qoıǵan saýaldaryna da jaýap berdi.
«Sizge deıingi oblys basshylary ártúrli mamandyqtardyń ıesi boldy. Olardyń arasynda ekonomıster, aýyl sharýashylyǵynyń mamandary, qurylysshylar, tipti, kúshtik qurylymnyń ókilderi de qyzmet etti. Siz oblys ákimi bolyp taǵaıyndalǵan birinshi dıplomatsyz. El Prezıdenti Nursultan Nazarbaevtyń ózi Sizdi oblys aktıvine tanystyryp, taǵaıyndaǵaly 100 kún ótti. Sol joly Elbasy aımaqty damytýǵa baılanysty birqatar máselelerdi qoıdy. Aqmola oblysynyń odan ári damýyna qatysty sizdiń kózqarasyńyzdy bilgim keledi»,-degen saýal qoıdy jýrnalıst.
Oǵan jaýap retinde ákim. «Iá, men shynynda da meniń mamandyǵym dıplomat. Keshegi keńes zamanynda mundaı mamandyqqa ıe bolý ońaı emes edi. Bizdiń kýrstastar jyl aralatyp kezdesý ótkizedi. Bir qyzyǵy mundaı kezdesýler Máskeýde emes, Astanada ótkizilip júr. Men Máskeýden Soltústik Qazaqstan oblysy ákiminiń orynbasary qyzmetine keldim. Jergilikti jerdegi jumyspen sol kezde aınalystym. Jalpy ózime naqty jumys istegen unaıdy. Mysaly, el ıgiligine jaratylatyn jaqsy bir ǵımarat saldyń eken deıik, álgi eńbegiń qansha jyl halyqtyń kádesine jaraıdy ǵoı», - dedi.
Sonymen qatar, baspasóz máslıhatyna jınalǵan jýrnalıster oblys ákimine týrızmdi damytý, eldi mekenderdi kórkeıtip, abattandyrý, kógildir otynmen qamtamasyz etý, turǵyn úı-kommýnaldyq sharýashylyǵynyń jumysyn shıratý, Astana-Býrabaı baǵytyndaǵy kúre joldyń boıyndaǵy jolaýshylarǵa qyzmet kórsetýdi jaqsartý, Astana qalasy mańynda demalys oryndaryn kóbirek uıymdastyrý tárizdi san alýan saýaldar qoıdy.
Oblys ákimi buqaralyq aqparat quraldary ókilderiniń kókeıinde júrgen saýaldarǵa barynsha ashyq ári jan-jaqty jaýap qatty. Sóz sońynda oblys basshysy óziniń tilshiler qaýymymen tildesýge qashanda daıyn ekendigin aıta kelip, olardy aldaǵy tól merekelerimen quttyqtady.
