Aqmola oblysynyń ákimi Astrahan aýdanynda kásipkerlermen kezdesti
KÓKShETAÝ. QazAqparat - Aqmola oblysynyń ákimi Sergeı Kýlagın jumys saparymen Astrahan aýdanynda boldy. Bul týraly oblys ákiminiń baspasóz qyzmetinen habarlady.
Aımaq basshysy aýdandaǵy iri sharýashylyqtardyń birinen sanalatyn «Fedorenko jáne K» seriktestiginiń egistik alqaptaryn aralap kórip, jergilikti aýyl sharýashylyǵy qurylymdarynyń basshylarymen kezdesti. Kezdesýde egistik alqaptaryndaǵy astyqty kútip-baptaý, aldaǵy egin oraǵyna daıyndyq jumystary saralandy.
«Fedorenko jáne K» seriktestigi basshysynyń aıtýyna qaraǵanda, bıyl sharýashylyq 11 myń gektarǵa dán sepken. Hımııalyq óńdeý jumystaryn tıisti deńgeıde júrgizgen seriktestiktiń osy kúni egini jaıqalyp, bitik ósip otyr.
Seriktestik jumysyna oń baǵasyn bergen aımaq basshysy osy baǵyttaǵy jumystardy odan ári shıratýdy tapsyrdy.
Aıta ketý kerek, atalǵan sharýashylyq eginmen qatar, etti jáne sútti baǵytta mal sharýashylyǵyn da qatar alyp keledi. Qazirgi kezde, munda 807 bas iri qara, 68 jylqy ósirilýde. Seriktestikte 177 adam eńbek etedi. Osy kúni sharýashylyq bıylǵy jylǵa josparlanǵan 1 300 tonn shóptiń 800 tonnasyn ázirlep úlgergen.
