Aqmola oblysynyń ákimi Abaı eskertkishine qatysty pikir bildirdi
KÓKShETAÝ. QazAqparat - Aqmola oblysynyń ákimi Málik Myrzalın Stepnogorsk qalasyndaǵy №6 mektep-gımnazııasynyń aldynda ornatylǵan Abaı eskertkishine qatysty pikir bildirdi, dep habarlaıdy QazAqparat tilshisi.
«Atalǵan máselege beı-jaı qaramaı laıyqty nazar aýdarǵan barlyq adamdarǵa alǵys aıtamyn. Stepnogorsk qalasynda 1977 jyly ashylǵan №6 orta mektebi alǵashqy kezden bastap Abaı Qunanbaevtyń atymen atalǵany belgili. Tapsyrys boıynsha Almaty qalasynda quıylǵan qazaq aǵartýshysynyń bıýsti eki jyl ótken soń mekteptiń aldyna ornatylǵan. Atalǵan másele boıynsha áleýmettik jelilerde paıda bolǵan qarama-qaıshy pikirlerge nazar aýdara otyryp, eń aldymen turǵyndardyń pikiri eskerilýi tıis dep sanaımyn. Bul másele Stepnogorsk qalasyna jasalatyn kezekti jumys sapary barysynda talqylanatyn bolady. Sonymen qatar, qujattamalyq derekter men sarapshylardyń kózqarastaryna nazar aýdarylýy tıis», - dep jazady ákim Feısbýktegi jeke paraqshasynda.
Eske sala keteıik, osyǵan deıin habarlaǵanymyzdaı áleýmettik jelide Stepnogorsk qalasyndaǵy №6 mektep-gımnazııasynyń aýmaǵynda turǵan Abaı Qunanbaevtyń bıýst-eskertkishine qatysty vıdeo taraǵan bolatyn. Vıdeo avtory A. Qunanbaevtyń bıýstin Lenınge uqsatyp, osyǵan jol bergen adamdardy synǵa aldy.
Onyń aıtýynsha, munyń aldynda bul jerde Vladımır Lenınniń eskertkishi turǵan. Keıin basyna taqııa kıgizip, Abaıǵa uqsata salǵan. Avtordyń pikirine jeli qoldanýshylary qosylyp, ózderiniń narazylyqtaryn bildirgen bolatyn. Áleýmettik jeli qoldanýshylarynyń narazylyǵyna kóp keshiktirmeı qala ákimi Ánýar Kúmpekeev te túsinik bergen edi.
Shahar basshysy óz sózinde áleýmettik jelide daýǵa ilikken Abaıdyń bıýstiń ornatylǵanyna 40 jylǵa jýyqtaǵan jáne oǵan deıin mekteptiń aldynda eshqandaı eskertkish bolmaǵanyn aıtty.
