Aqmola oblysynyń ákimi 105 jastaǵy keıýanany Naýryz meıramymen quttyqtady

KÓKShETAÝ. QazAqparat – Aqmola oblysynyń ákimi Ermek Marjyqpaev tyl eńbekkeri, «Altyn alqa» ıegeri Sálıma Álıevanyń shańyraǵynda bolyp, Naýryz meıramymen quttyqtady, dep habarlaıdy QazAqparat tilshisi oblystyq ishki saıasat basqarmasyna silteme jasap.

Tyl eńbekkeri Sálıma Álıeva qazir 105 jasta. Qarııanyń aıtýynsha, soǵys jyldarynda tylda tynymsyz eńbek etip, sol ómirdiń aýyrtpalyǵy men qıyndyqtaryn kórgen.

Jubaıy 1941 jyly soǵysqa attanyp, Stalıngrad, Býdapesht qalalarynda jaýǵa qarsy urysqa qatysty. Keıin soǵys aıaqtalǵan soń 1944 jyly elge oraldy. Ekeýi balalaryn ósirip, tárbıeledi. 1994 jyly jary dúnıeden ótti. Búgingi kúni Sálıma Baıazıtqyzy nemereleri men shóbereleriniń qyzyǵyn kórip otyr. Keıýana jasy ǵasyrdan assa da, áli tyń tylda sińirgen eńbegi úshin alǵan nagradalar men «Altyn alqa» medalin maqtanyshpen omyraýyna taǵyp alady.

Búginde aqjaýlyqty áje Kókshetaýda jıen nemeresi Ǵadyljan men kelini Nazgúl qolynda turady. Jalpy, qarııa osy kúni 23 nemereden 25 shóbere súıip otyr.

Kezdesý barysynda aımaq basshysy táýelsizdik jyldaryndaǵy barlyq jetistikter soǵys jáne tyl ardagerleriniń laıyqty erligi men eńbeginiń arqasynda alynǵanyn atap ótti.

«Ulystyń uly kúni - Naýryz merekesinde kóp jyldyq adal eńbegińiz úshin, tájirıbeńiz ben meıirimdiligińiz úshin Sizge myń alǵys aıtamyn! Naýryz merekesi jetistik, molshylyq pen tatýlyq ákelsin. Árkez ortamyzda aman otyrǵaısyz. Shańyraǵyńyzǵa yryzdyq pen bereke nury shalqysyn», - dedi Ermek Marjyqpaev.

Óz kezeginde, tyl eńbekkeri aımaq basshylyǵyna kórsetken qamqorlyǵy úshin alǵys bildirip, otanymyzǵa beıbit aspan men baqytty ómir tiledi.

Sondaı-aq, osy kúni oblys ákimi qarttar men múgedekterge arnalǵan «Úmit Shańyraq» pansıonatyna baryp, Naýryz meıramymen quttyqtady.