Aqmola oblysynyń 5 aýdanynda sý tasqyny qaýpi joıyldy

KÓKShETAÝ. QazAqparat - Aqmola oblysynyń bes aýdanynda sý tasqyny qaýpi joıyldy. Bul týraly aýmaqtyq Tótenshe jaǵdaılar departamenti bastyǵynyń orynbasary Manarbek Shapaǵatov málim etti, dep habarlaıdy QazAqparat tilshisi.

TJD bastyǵy orynbasarynyń aıtýynsha, óńirde sý tasqynynyń qaýpi sáýirdiń birinshi onkúndiginde artty. Ásirese, kúnniń kúrt jylýyna baılanysty Tselınograd, Arshaly aýdandarynda kúrdeli jaǵdaı qalyptasty. Osyǵan baılanysty 1-5 sáýir aralyǵynda yqtımal sý tasqynynyń zardaptaryn joıý úshin atalǵan aýdandarǵa Atbasar aýdanynan, sondaı-aq Nur-Sultan jáne Qaraǵandy qalalaryndaǵy áskerı bólimderden qosymsha qutqarýshylar toby keldi.

«Jalpy, oblys boıynsha eldi mekenderden 1,1 mıllıon tekshe metrden astam qar shyǵarylyp, 800 myń tekshe metrden astam erigen qar sýy sorǵytyldy. Budan bólek, qum salynǵan 9,2 myń qap tóseldi, 1,3 shaqyrym bolatyn bóget salynyp, nyǵaıtyldy, sondaı-aq, 98 shaqyrym sý arnasy tazartyldy», - dedi Manarbek Shapaǵatov.

Departament basshysy atap ótkendeı, qazirgi tańda oblystyń jeti óńiri – Qosshy qalasy, Tselınograd, Arshaly, Astrahan, Atbasar, Ereımentaý, Sandyqtaý aýdandary sý basý qaýpi joǵary ortasha deńgeıge aýystyrylǵan.

«Jalpy, oblys aýmaǵyndaǵy sý tasqyny jaǵdaıy oblystyq jáne óńirlik sý tasqynyna qarsy jedel shtabtardyń, jergilikti atqarýshy organdardyń, azamattyq qorǵaý organdarynyń jáne QR Tótenshe jaǵdaılar mınıstrliginiń táýlik boıy baqylaýynda. Sý tasqyny qaýpiniń joıylýyna baılanysty Zerendi, Býrabaı, Birjan sal aýdandary jáne Stepnogor, Kókshetaý qalalarynda sý tasqynyna qarsy jedel shtabtardyń jumysy toqtatyldy», - dep tolyqtyrdy Manarbek Shapaǵatov.

Osyǵan deıin Aqmola oblysynda eki kompanııa qant baǵasyn sebepsiz kóterip jibergenin jazǵanbyz.