Aqmola oblysynyń 3 jobasy ındýstrıalandyrý kartasyna engizildi
KÓKShETAÝ. QazAqparat - Aqmola oblysynyń Óńirlik kommýnıkatsııalar qyzmetinde ótken brıfıngte Tselınograd aýdanynyń ákimi Málǵajdar Tátkeev óńirdiń áleýmettik-ekonomıkalyq damýynyń 2018 jylǵy qorytyndysy men bıylǵy jyldaǵy josparlary týraly aıtyp berdi, dep habarlaıdy QazAqparat tilshisi.
Aýdan ákiminiń aıtýynsha, óńirde agroónerkásip, tsıfrlandyrý, ónerkásip jáne kásipkerlik, turǵyn úı qurylysy, sýmen jabdyqtaý, gazdandyrý salasynda birqatar jobalar qolǵa alynyp otyr.
«Agrarly saladaǵy jalpy ónim kóleminiń 52 paıyzyn quraıdy. Bıylǵy jyly aýyl sharýashylyǵy salasynda 30,8 mıllıard teńgeniń ónimi óndirildi. Ótken jazdaǵy aýa raıynyń qolaısyzdyǵyna qaramastan 281 myń tonna astyq jınaldy. «GREENSTAR» JShS - niń sýarý júıesi arqyly ár gektardan rekorttyq kórsetkishte 56 tonna kartop, 80 tonna kókónis jáne 16 tonn jonyshqa alyndy. Sol sebepti, aýdannyń aýyl sharýashylyǵy taýar óndirýshileri aǵymdaǵy jyly 17 000 gektar alqapta jańbyr jáne jaıylma sý júıesin engizýdi josparlap otyr», - deıdi Málǵajdar Tátkeev.
Sonymen qatar, aýdan ákimi óńirde tsıfrlandyrý máselesi erekshe kóńil bólingenin atap ótti. Aýdandaǵy «Astana-Ónim» AQ men «Rodına» JShS tolyq tsıfrlandyryldy. Al, «Akmola-Fenıks» AQ naqtyly eginshilik tehnologııasyn engizip otyr. Qoldau.kz elektrondy kartasyn qalyptastyrý, jaılymdar men shabyndyq jerlerdi tsıfrlandyrý boıynsha jumystar júrgizilýde.
«Ótken jyly Tselınograd aýdanyndaǵy básekege qabiletti úsh joba anyqtalyp, Indýstrıalandyrý kartasyna engizildi. Naqtyraq aıtsaq, «Qumtas AKK» JShS-niń quny 300 mıllıon teńge bolatyn beton jáne beton ónimderin shyǵaratyn zaýyttyń, «Sydyqbek» JShS-niń 958 mıllıon teńgeni quraıtyn sút jáne sút ónimderin óńdeıtin kesheni jáne «Astana Ceramic» JShS-niń 3,8 mıllıard teńge keramıkalyq tastar men bloktar shyǵaratyn zaýytynyń qurylystary bar», - deıdi aýdan ákimi.
