Aqmola oblysynyń 3 aýdanyna shekteý engiziledi
KÓKShETAÝ. QazAqparat - 3 sáýirden bastap Tselınograd, Arshaly jáne Shortandy aýdandaryna shekteý engiziledi. Bul týraly oblystyq taýarlar men qyzmetterdiń sapasy men qaýipsizdigin baqylaý departamentiniń basshysy Aınagúl Mýsına aıtty, dep habarlaıdy QazAqparat tilshisi.
Departament basshysynyń málimetinshe, 17 jaǵdaı sanıtarlyq qyzmetter Nur-Sultan qalasy boıynsha COVID-19 júrgizgen epıdemıologııalyq zertteý kezinde tirkedi. Al, 2 jaǵdaı naýqastardyń ózderi medıtsınalyq kómekke júgingen kezinde anyqtaldy. Oblys boıynsha COVID-19 Tselınograd aýdanynda -14, Arshaly aýdanynda-3, Kókshetaý qalasynda - 1, Shortandy aýdanynda -1 jaǵdaı tirkeldi.
«Qazirgi kezde epıdemıologııaǵa qarsy keshendi sharalar júrgizildi, naýqastarmen jaqyn jáne baılanysta bolýy múmkin adamdary, jumysy men úıiniń mekenjaıy anyqtaldy. Epıdemıologııalyq jaǵdaıdyń kúrdelinýine baılanysty Aqmola oblysynda karantındik sharalardy kúsheıtý týraly qaýly shyǵaryldy. 3 sáýir keshki saǵat 19:00 bastap Tselınograd, Arshaly jáne Shortandy aýdandary aýmaǵyna kirip shyǵýǵa shekteý qoıylady. Atalmysh aýdandar men Kókshetaý qalasy shekaralarynda blokpostar qoıylady. Kirip shyǵýǵa shekteledi, azamattar men kólikterdiń tizimi Aqmola oblysy ákimdigi janyndaǵy tótenshe jaǵdaı rejımin qamtamasyz etý boıynsha oblystyq shtab anyqtaıdy. Kirip shyǵýǵa ruqsatty departament beredi», - deıdi Aınagúl Mýsına.
Budan bólek, ol úı mańyndaǵy dúkender men dárihanalardy sanamaǵanda barlyq saýda oryndary jumysyn toqtatynyn atap ótti.
«Qoǵamdyq tamaqtaný kásiporyndary taýarlardy oraýly túrinde ǵana jetkizip beretin bolady. Aýdan jáne qala ákimderi atalmysh eldi-mekender aýmaǵynda dezınfektsııalyq sharalardy kúsheıtýleri qajet», - dep tolyqtyrdy Aınagúl Mýsına.
Sonymen qatar, departament basshysy Egindikól aýdany turǵynynyń koronavırýsqa kúdikpen Astrahan aýdandyq juqpaly aýrýlar bólimshesine jatqyzylǵandyǵy týraly aqparattyń baryn aıtty.
