Aqmola oblysynyń 2 aýdanynda tótenshe jaǵdaı jarııalandy
KÓKShETAÝ. QazAqparat - Aqmola oblysynyń 2 aýdanynda aqtútek borannyń saldaryn joıý boıynsha tótenshe jaǵdaı jarııalandy, dep habarlaıdy QazAqparat tilshisi əkimdiktiń baspasóz qyzmetine silteme jasap.
Eske sala keteıik, 2018 jyldyń 11 qańtarynda bolǵan borannan Ereımentaý aýdanynda 3 mektep pen Balalar shyǵarmashylyq úıiniń shatyrlary kókke ushsa, 4 aýyl jaryqsyz qaldy. Qazirgi kezde, tabıǵattyń tosyn minezinen zardap shekken ǵımarattar tekserilip, jóndeý jumystaryna bólinetin qarjynyń kólemi anyqtaldy. Sondaı-aq jaryqsyz qalǵan eldimekenderge elektr energııasy sol kúni qaıta qosyldy.
Al Arshaly aýdanynda 5 mekteptiń shatyry búlinse, 1 mekteptiń shatyry tolyq julynyp tústi. Bul ǵımarattarǵa da keltirilgen shyǵyn kólemi zerttelip, aǵymdaǵy jóndeý jumystaryna qajetti qarjy kólemi anyqtaldy. Barlyq bilim ordalarynda qar ýaqytyly tazartylyp, sabaq protsesine kedergi keltirilgen joq.
Osyǵan baılanysty Arshaly jəne Ereımentaý aýdandarynyń ákimderi tabıǵı sıpattaǵy jergilikti deńgeıdegi tótenshe jaǵdaı jarııalaý týraly sheshim qabyldady. Zalal keltirilgen nysandardy jóndeýge aqsha qarajaty tótenshe jaǵdaılar rezervinen bólinetin bolady.
Sondaı-aq aıta keteıik, Aqkól aýdanynda "QazAvtojol" UQ-nyń jóndeý sheberhanasy ǵımaratynyń shatyry búlindi. Ony kəsiporyn óz qarajaty esebinen qalpyna keltiretin bolady.
Tselınograd aýdanynda elektr jaryǵynyń óship qalýy boıynsha 25 jaǵdaı oryn aldy. Sol kúni túngi 22:00 deıin jaryq qaıta qosyldy.
