Aqmola oblysyndaǵy jol apatynan úsh adam mert boldy
KÓKShETAÝ. QazAqparat - Aqmola oblysynda eki kólik soqtyǵysty. Saldarynan úsh adam kóz jumyp, eki jolaýshy dene jaraqatymen aýrýhanaǵa tústi, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, 2020 jylǵy jeltoqsannyń 19-da saǵat 17:28-de Esil aýdandyq PB kezekshilik bólimine Nur-Sultan qalasynyń turǵyny telefon shalyp, «Jezqazǵan-Petropavl» avtojolynyń 551 shaqyrymynda jol apaty bolǵanyn aıtqan.
«Anyqtalǵandaı, saǵat 17:14 «Jezqazǵan – Petropavl» avtojoly arqyly Arqalyqtan Qostanaı qalasyna baǵyt alǵan «Shevrole-Trıbleızer» avtokóliginiń 63 jastaǵy júrgizýshisi manevr jasamaqshy bolyp, qarsy baǵytta júrip kele jatqan «DAF» kóligimen soqtyǵysty. Saldarynan jeńil kóliktiń júrgizýshisi men eki jolaýshysy oqıǵa ornynda kóz jumdy. Taǵy eki jolaýshy 25 jastaǵy qyz ben 39 jastaǵy er adam túrli dene jaraqatymen Esil aýdanynyń aýrýhanasyna jatqyzyldy», - deıdi vedomstvodan.
Qazirgi kezde, jol apaty boıynsha QR QK 345 babynyń 4 bóligi boıynsha sotqa deıingi tergeý sharalary júrgizilýde.
