Aqmola oblysyndaǵy jarylys: Zardap shekkenderge kómek kórsetý shtaby quryldy
ShORTANDY. QazAqparat – Aqmola oblysynda Shortandy kentinde gaz jarylysynan zardap shekkenderge kómek kórsetý shtaby quryldy, dep habarlaıdy QazAqparat tilshisi.
Aqmola oblysy polıtsııa departamentiniń baspasóz qyzmetiniń málimetinshe, qazirgi ýaqytta zardap shekken otbasylardyń músheleri týystarynyń úıine ornalastyryldy. Sonymen qatar Shortandy aýdanynyń ákimdigi tarapynan baspanasy órtengender úshin eki páter bólindi. Budan bólek, qaza bolǵandardy jerleýdi uıymdastyrý boıynsha kómek kórsetiledi. Oqıǵadan zardap shekkenderge kómek kórsetý jónindegi shtab quryldy.
«Shortandyda gaz ballonynyń jarylý oqıǵasy boıynsha polıtseıler «órt qaýipsizdigi talaptaryn buzý» baby boıynsha sotqa deıingi tergeýdi bastady», - dep atap ótti vedomstvodan.
Qaıǵyly oqıǵanyń mán-jaıy men sebepterin anyqtaý úshin tıisti jedel-tergeý toby jumys istep jatyr.
Eske sala ketsek, keshe túnde Shortandy kentinde barak tıpti úsh páterli úıde gaz ballony jaryldy. Aqmola oblystyq TJD bastyǵynyń orynbasary Manarbek Shapaǵatovtyń aıtýynsha, órttiń shyǵýyna qarapaıym órt qaýipsizdigi, ıaǵnı gaz qurylǵysyn paıdalaný erejesiniń saqtalmaýy sebep bolǵan.
Aqmola oblysynyń densaýlyq saqtaý basqarmasynyń basshysy Narıman Syzdyqovtyń málimdeýinshe, jarylystan zardap shekken eki balanyń jaǵdaıy óte aýyr, deneleriniń 90 paıyzyn kúıik shalǵan. Zardap shekkenderge 6 medıtsınalyq brıgada kómek kórsetti.
