Aqmola oblysyndaǵy jańa qus fabrıkasy ımportty azaıtady

KÓKShETAÝ. QazAqparat - Aqmola oblysynda jýyrda ashylatyn Makınsk qus fabrıkasy Qazaqstanǵa qus eti ımportynyń úshten bir bóligin jabatyn bolady. Bul týraly aımaq basshysy Málik Myrzalın oblystyq máslıhat depýtattary aldynda ótken eseptik kezdesýinde aıtty, dep habarlaıdy QazAqparat tilshisi.

«Elimizdegi eń iri jobalardyń biri - jyldyq qýaty 50 myń tonnany quraıtyn Makınsk qus fabrıkasy. Ony iske qosý jergilikti óndiristiń jáne qus etin jetkizip berý kólemin ulǵaıtýǵa múmkindik beredi», - dedi M.Myrzalın.

Aımaq basshynyń aıtýynsha, jylyna 25 myń tonna qus etin óndirý boıynsha jobanyń alǵashqy kezeńi aıaqtalýǵa jaqyn. Ony 28 qyrkúıekte iske qosý josparlanǵan. Fabrıka tolyq qýatymen keler jyly jumys isteı bastaıtyny kózdelgen.

«Fabrıka tolyq qýatyna kóshken kezde, elimizge qus eti ımportynyń úshten bir bóligin jabatyn bolady», - dep tolyqtyrdy M.Myrzalın.

Aıta keteıik, jyl saıyn elimizge shamamen 170 myń tonna qus eti jetkiziledi.