Aqmola oblysyndaǵy túzeý mekemesinde mert bolǵan adamnyń óliminiń sebepteri anyqtalýda - Bas prokýratýra
ASTANA. Tamyzdyń 12-si. QazAqparat /Aıdar Ospanálıev/ - Aqmola oblysy, Granıtnyı aýylyndaǵy bas bostandyǵynan aıyrý kolonııasyndaǵy tártipsizdikter barysynda mert bolǵan azamattyń ólimi ózin-ózi órteýdiń saldarynan bolǵan.
Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti.
Onyń sózine qaraǵanda, bul máselege baılanysty oblystyq prokýratýra men qylmystyq atqarý júıesiniń basshylary jýrnalıstermen arnaıy brıfıng ótkizdi. Qazirgi tańda túzeý kolonııasynda tártip ornatyldy. Keshe, túngi 22.00 shamasynda quqyq qorǵaý organdary kolonııada tártip ornatý úshin arnaıy operatsııa júrgizdi. «Búgingi kúni ol jerde ishki ister organdary 2 qylmystyq is qozǵady. Ol túzeý kolonııasynyń basshylyǵynyń zańdy talaptaryna baǵynbaý jáne sottalǵandardyń dene jaraqattaryn salýmen baılanysty bolyp otyr.
Sondaı-aq osy oqıǵaǵa oraı arnaıy tergeý toby qurylyp, tıisti jumystar júrgizilýde, dedi resmı ókil.
Onyń sózine qaraǵanda, tamyzdyń 9 men 11 aralyǵynda oqıǵa bolǵan jerde 102 sottalǵan adam túrli jaraqattar alyp, olardyń barlyǵyna tolyq medıtsınalyq kómek kórsetildi. «Sondaı-aq, kolonııanyń mańynda bir adamnyń máıiti tabyldy. Aldyn ala málimetter boıynsha, ol ózin-ózi órtep jibergen. Degenmen kisi ólimine baılanysty tergeý jumystary jalǵasýda. Osy kezde emdeý oryndarynda 42 sottalǵan em qabyldaýda. Qalǵandary jazasyn óteýdi jalǵastyryp jatyr», dedi resmı ókil.
