Aqmola oblysyndaǵy «Shapaǵat» ortalyǵynyń taǵy bir qarııasy indet juqtyrdy
NUR-SULTAN. QazAqparat –Aqmola, Atyraý jáne Qyzylorda oblystarynda anyqtalǵan koronavırýs indetine shaldyǵýdyń jańa oqıǵalary týraly málimet berildi, dep habarlaıdy QazAqparat coronavirus2020.kz-ke silteme jasap.
15 sáýir, saǵat 12.30-daǵy sońǵy málimet boıynsha, Qazaqstanda indetke shaldyqqandardyń jalpy sany 1275 adamǵa jetti. Onyń ishinde Aqmola oblysynda – 1, Qyzylorda oblysynda – 2 jáne Atyraý oblysynda 1 oqıǵa bar.
«Aqmola oblysynda anyqtalǵan naýqas Tselınograd aýdany, Aqqaıyń aýylynda ornalasqan «Shapaǵat« áleýmettik qyzmet kórsetý ortalyǵynyń qamqorlyǵyndaǵy 1941 jylǵy er adam. Atalǵan mekemede KVI juqtyrý jaǵdaılary buǵan deıin de anyqtalǵan edi. Naýqas Arshaly aýdandyq aýrýhanasynyń provızorlyq statsıonarynda karantınde bolǵan», - delingen aqparatta.
Qyzylorda oblysynda indetti juqtyrǵandardyń ekeýi de Qyzylorda qalasynyń turǵyndary. Bekitilgen algorıtmge sáıkes, analız alynyp, olar oń nátıje kórsetti. Ekeýi de juqpaly aýrýlar aýrýhanasyna jatqyzyldy.
Atyraý oblysyndaǵy jańa oqıǵa 42 jastaǵy jergilikti turǵynnan anyqtaldy.
Ol KVI juqtyrǵan adammen baılanysta bolǵan.
«Er adam ınfektsııalyq statsıonarǵa jatqyzyldy. Jaǵdaıy - qalypty. Oǵan hattamaǵa sáıkes em sharalary júrgizilýde», - delingen málimette.
