Aqmola oblysyndaǵy ózenderde sý deńgeıi birshama tómendedi
NUR-SULTAN. QazAqparat - Sý tasqyny jaǵdaıyna monıtorıng júrgizý úshin óńirlerde, ıaǵnı Aqmola, Shyǵys Qazaqstan, Qostanaı, Pavlodar, Soltústik Qazaqstan oblystarynda jáne Nur-Sultan qalasynda tasqynǵa qarsy jedel shtabtar jumys isteıdi, dep habarlaıdy QazAqparat.
«Aqmola oblysynda 14 sáýirden bastap Astrahan aýdany Staryı Kolýton aýylynyń mańynda ornalasqan Qalqutan ózenindegi sý deńgeıiniń tómendeýi baıqaldy», - delingen QR ІІM TJ komıteti baspasóz qyzmetiniń málimetinde.
Sonymen qatar, Jabaı ózenindegi sý deńgeıi 50 sm tómendegeni baıqaldy (Atbasar qalasynyń avtomobıl kópiri aýdanynda naqty deńgeıi - 2,9 m, qaýipti shebi-3,45 m). TJ departamenti, polıtsııa departamenti jáne jergilikti atqarýshy organdarynyń ókilderi sý deńgeıiniń qaýipsizdigin baqylaýǵa baılanysty tıisti kezekshilikti atqarýda.
Soltústik Qazaqstan oblysynyń aýmaǵynda rettelmeıtin Sergeev sý qoımasy ornalasqan, onyń naqty kólemi 883,7 mln tekshe metrdi qurady. Kóktemgi sý tasqynyna baılanysty 2 sáýirden bastap Esil ózeni jaıylmasynyń tómengi jaǵynda ornalasqan osy gıdrotehnıkalyq qurylystyń bóget qyrynan sýdyń asyp tógilýi baıqaldy. Búginde sýdyń tasýy deńgeıi birtindep tómendep keledi.
Petropavl sý qoımasynyń naqty kólemi 28,12 mln tekshe metr, tasqyn sýy osy gıdrotehnıkalyq qurylys arqyly tranzıttik rejımde ótedi.
«Oblystyń barlyq gıdrotehnıkalyq nysandary shtattyq rejımde jumys istep tur. Osy obektilerde táýlik boıy «Qazsýshar» RMK mamandary, polıtsııa qyzmetkerleri kezekshilik etedi. Bul obektiler jergilikti atqarýshy organdar men azamattyq qorǵaý organdary qyzmetkerleriniń turaqty baqylaýynda», - dep atalyp ótken komıtet habarlamasynda.
Sý tasqyny kezeńiniń qaýipsiz ótýi maqsatynda TJK aýmaqtyq bólimsheleri jergilikti atqarýshy organdarmen birlese otyryp, elimizdiń sý tasqyny qaýpi bar aımaqtarynda táýlik boıy monıtorıng júrgizý jáne tasqyn sýlardyń qaýipsiz ótýi boıynsha aldyn alý is-sharalaryn uıymdastyrdy. Bul sý tasqyny jaǵdaıyn turaqtandyrýǵa múmkindik berdi. Osy jumystarǵa órt sóndirýshiler men qutqarýshylar, oblystyq TJD--nyń ınspektorlyq jáne jeke quramy jumyldyrylady.
Atap aıtqanda, bıyl 163,855 shaqyrym qorǵaý bógetterine qurylys-jóndeý jumystary, sý tasqyny qaýpi bar ózen arnalarynda jaǵalaýdy nyǵaıtý, túbin tereńdetý jáne túzetý, sondaı-aq 192,4 shaqyrym sý burý arnalaryn ornatý, muzdy qopsytý boıynsha jumystar júrgizildi. Ózenderde jarylǵysh zattardy paıdalana otyryp, 236 jarý jumystary atqaryldy.
