Aqmola oblysyndaǵy naýqastar qaýipti indetti qaıdan juqtyrdy
NUR-SULTAN. QazAqparat - Aqmola oblystyq taýarlar men qyzmetterdiń sapasy men qaýipsizdigin baqylaý departamentiniń basshysy Aınagúl Mýsına koronavırýs ınfektsııasyn juqtyrǵan turǵyndar týraly málimet berdi, dep habarlaıdy QazAqparat.
1 sáýirdegi jaǵdaı boıynsha Aqmola oblysynda vırýs juqtyrǵan naýqastar sany 16-ǵa jetti.
Sońǵy anyqtalǵan 5 naýqastyń tórteýi buryn koronavırýs juqtyrǵan naýqastarmen baılanysta bolǵan, 1 adam Kókshetaý qalasynan tabyldy.
Eki naýqas 1984 jyly týǵan áıel men 2017 jylǵy sábı - Qoıandy aýylynyń turǵyndary. Olar 1979 jyly týǵan Qoıandy aýylynyń turǵynynan vırýs juqtyrǵan. Er adam elordada koronavırýs ınfektsııasy zerthanalyq túrde rastalǵan adammen jumys babymen baılanysta bolǵan.
1962 jyly týǵan áıel men 2011 jylǵy jasóspirim Qosshy aýylynda turady. Olar Nur-Sultan qalasynan kelgen týys áıelmen kezdesken. Bul áıelden 26 naýryzda koronavırýs ınfektsııasy tabyldy. Al 28 naýryzda osy oqıǵa boıynsha 3 adam aýrýhanaǵa jatqyzyldy.
Kópbeıindi oblystyq aýrýhana janyndaǵy emhananyń sanıtarlyq qyzmetkeri - 1962 jyly týǵan Kókshetaý turǵyny jumys barysynda dene qyzýymen jáne JRVI belgilerimen terapevtke qaralǵan. Áıelge sol sátte COVID-19 testi júrgizildi jáne ınfektsııanyń bary rastaldy. Onymen baılanysta bolǵan tulǵalar anyqtalyp jatyr. Ázirge 35 medıtsınalyq qyzmetker, 4 otbasy múshesi karantındik statsıonarǵa jatqyzyldy. Kópbeıindi oblystyq aýrýhanada karantın jarııalanyp, epıdemııalyq tekserý júrip jatyr.
Patsıentter búgin Aqmola oblystyq týberkýlezge qarsy dıspanseriniń ınfektsııa bólimine jatqyzyldy. Jaǵdaılary qanaǵattanarlyq.
Qazirgi ýaqytta oblysta 174 patsıent aýrýhanada jatyr. 13 adam - Aqmola oblystyq týberkýlezge qarsy dıspanserinde, 2 adam - Nur-Sultan qalalyq ftızıopýlmonologııa ortalyǵynda, 94 patsıent - provızorlyq orynda, 65 adam - karantındik statsıonarda jatyr. Odan bólek, 362 adam úı karantınine oqshaýlanǵan.
Aıta keteıik, elimizde koronavırýs ınfektsııasyn juqtyrý boıynsha barlyǵy 372 jaǵdaı tirkelgen.
