Aqmola oblysyndaǵy medqaldyqtardy joıatyn zaýyt basqa jerge kóshiriledi
NUR-SULTAN. QazAqparat - Aqmola oblysynyń Tselınograd aýdanyndaǵy medıtsınalyq qaldyqtardy joıý zaýyty basqa jerge kóshiriledi. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.
Ortalyq kommýnıkatsııalar qyzmetinde ótken onlaın brıfıng barysynda BAQ ókilderi mınıstrden Aqmola oblysy Tselınograd aýdanyndaǵy medıtsınalyq qaldyqtardyń kózin joıatyn kásiporynnyń jumysy nelikten toqtamaı jatqanyn suraǵan edi.
«Meniń biliýimshe, bul zaýyttyń jumysy toqtatyldy. Rasynda da bul máselege qatysty halyqtan da, jýrnalısterden de birneshe márte saýal kelip túsken bolatyn. Men osydan birneshe aı buryn bul másele jaıynda aıtqan da edim. Biz tıisti saýaldy sotqa berdik. Endi sottyń sheshimin kútip otyrmyz. Degenmen, meniń bilýimshe bul zaýyttyń jumysy qazirgi ýaqytta tolyqtaı toqtap tur. Aqmola oblysynyń ákimimen sóılesip, atalǵan kompanııaǵa basqa jerden arnaıy ýchaske bólý máselesin kótergenmin. Jáne de bul másele óz sheshimin tapqan edi. Sondyqtan zaýyt basqa jerge kóshiriledi», - dep jaýap berdi Maǵzum Myrzaǵalıev.
